VOV4.Xơ Đăng - Kơxo lơ 21/7, jâ Võ Thị Ánh Xuân, Kăn xiâm phŏ hnê ngăn tơnêi têa hiăng veăng roh hôp trâm mâ vâi kơdrâi pro mô đô̆i kăch măng tro lêng kong têa ê rup phâk rơxông tơplâ xâ Mih nah klăng leh tơbâ 75 hơnăm hâi Mô đô̆i rong râ a Pơlê kong kân Hồ Chí Minh. Tung 200 ngế kăn teăng mâ ăm lối 600 ngế kơdrâi pro mô đô̆i kăch măng dêi Pơlê kong kân Hồ Chí Minh, mơhé ai ngế hiăng hên hơnăm laga xuân pơtối cho kuăn pơlê djâ troăng ahdrối, pleăng hnoăng cheăng mơjiâng ăm pơlê kong kân, tơnêi têa.

Kố xuân cho roh trâm mâ apoăng dêi mâu ngế kơdrâi pro mô đô̆i kăch măng tro lêng kong têa ê rup, kroăng phâk tung rơxông tơplâ xâ Mih. Xông tơpui a roh trâm mâ, jâ Võ Thị Ánh Xuân, Kăn xiâm phŏ hnê ngăn tơnêi têa teăng mâ Khu râ kăn pơkuâ Đảng, Tơnêi têa mơhno tơdroăng ki ía ƀă nhuô̆m pâ mơnê mâu tơdroăng ki pleăng dêi châ chăn, mơheăm chhá, pleăng hnoăng kân kĭn dêi mâu nôu, mâu miê, mâu nâ tro lêng kong têa ê rup kroăng phâk tung rơxông tơplâ xâ, klêi mê, tối nhên, rêm ngế kăn ƀô̆, đảng viên hâi kố thế hriâm hiâm mơno lĕm tro, mơdêk ivá pêi cheăng rơkê, khên tơnôu môi tiah mâu lêng kăch măng hơnăm mê nah, djâ tơnêi têa tơtêk, mơnhông rĕng ƀă krá tơniăn, pâ mơnê mâu rơxông prôk hdrối hiăng pleăng ăm tơdroăng tơniăn lĕm dêi tơnêi têa.

A Sa Ly tơplôu ƀă tơbleăng