Hâi lơ 27/5, Khu xiâm ngăn pơkeăng pơlât tơrŭm ƀă Vi ƀan kuăn pơlê dêi kong pơlê Quảng Ninh tơkŭm po Leh mơhnhôk khế pêi pro xua vâi hdrêng hơnăm 2026 ƀă pơxá “Vâi hdrêng hơniâp lĕm, tơniăn, chôa xông prôk tung chal kơxô̆”. Tơbleăng a leh mơhnhôk, jâ Võ Thị Anh Xuân, Phŏ kăn xiâm hnê ngăn tơnêi têa tối nhên vâi hdrêng cho tung la ngiâ ah dêi tơnêi têa, ‘no mơnhông ăm vâi hdrêng cho ‘no mơnhông ăm tơdroăng xông tơbrê ton ta ah dêi tơnêi têa.

Mâu hơnăm hdrối mê hía nah, hên luât tŏng gum vâi hdrêng hiăng châ tơbleăng pêi tơƀrê môi tiah ôh tá êa nâp, lơ kơdroh liăn hok tro nâp ăm hngêi trung dêi mâu hok tro phôh thong; kơjo kum kâ hmê kơhâi dế ăm hok tro; mơjiâng pro hngêi trung ai tíu kâ koi ối pơtê pơtối râ ƀă hên ki ê… Khế pêi cheăng xúa vâi hdrêng hơnăm kố kô tơbleăng hên tơdroăng pêi pro ai pơxúa khât tung lâp tơnêi têa, môi tiah: mơdêk ‘na rơkê kơxô̆ ƀă tơniăn tiô troăng hyôh ăm hdrêng; hbrâ mơdât klâk têa, mơdât xía vâ rong râ tơhôu tơpâm ‘nêk vâi hdrêng; mơhnhôk tăng liăn gum ăm vâi o.