Kơxê lơ 30/5, a Tíu pêi cheăng kăn xiâm hnê ngăn tơnêi têa, jâ Võ Thị Ánh Xuân, Kăn xiâm phŏ hnê ngăn tơnêi têa hiăng tơdah Khu râ kăn xiâm Hô̆i đong Tơnêi têa Măt trâ̆n Tơrŭm Mơnhông Tơnêi têa Kul xua pôa Nhem Valy, ngế cheăng tung Tíu xiâm Đảng Nhân yân Kul, Kăn xiâm phŏ hlối cho kăn chêh tôm xo rơkong Hô̆i đong Tơnêi têa Măt trâ̆n Tơrŭm Mơnhông Tơnêi têa Kul pro kăn pơkuâ khu kăn kố, dế pôu pêi cheăng a Việt Nam.

A rôh tơdah, Kăn xiâm phŏ hnê ngăn tơnêi têa tối rơdêi, Việt Nam đi đo ngăn nhuô̆m ƀă kơjo kum khât tơdroăng ki mơdêk tơrŭm cheăng ƀă tơnêi têa ki a chê tơniăn lĕm, tơrŭm tơroâ tiô khôi hmâ, tơrŭm tung tâi tâng kơvâ cheăng, krá tơniăn ton xŏn pơla Việt Nam ƀă Kul.

Mơnhên tối khât tơdroăng ki tơrŭm cheăng tơtro pơla Măt trâ̆n péa tơnêi têa tung pơla hdrối kố nah, Kăn xiâm phŏ hnê ngăn tơnêi têa rơhêng vâ, tung la ngiâ ah, Măt trâ̆n péa tơnêi têa pơtối tơrŭm krá tơniăn, pêi pro châ tơƀrê mâu tơdroăng tơkêa, tơrŭm cheăng ki hiăng kĭ; mơdêk hnoăng cheăng Măt trâ̆n péa pâ tung tâi tâng tơrŭm cheăng pơla péa Đảng, péa Tơnêi têa ƀă kuăn pơlê péa tơnêi têa xuân môi tiah tung tơrŭm pơla mâu kong pơlê, malối cho mâu kong pơlê a tíu tơkăng kong dêi péa tơnêi têa.