VOV4.Xơ Đăng - Drêng tơbâ 75 hơnăm hâi mố đô̆i rong râ, hlâ hía, kơxo lơ 25/7, a Tíu pêi cheăng kăn xiâm hnê ngăn tơnêi têa, jâ Võ Thị Ánh Xuân, kăn xiâm phŏ hnê ngăn tơnêi têa tơdah Khu kăn cho Khu mâu vâi kơdrâi lêng Trường Sơn – troăng Hồ Chí Minh. Tơpui a rôh tơdah, jâ Võ Thị Ánh Xuân tối, phiu ro drêng châ trâm mâu vâi kơdrâi lêng Trường Sơn khên tơnôu; kăn xiâm phŏ hnê ngăn tơnêi têa tơmâng xo ƀă mơnhên tối khât mâu tơdroăng ki veăng kum ƀă mâu tơdroăng ki pêi pro kơhnâ rơkê má môi dêi mâu lêng cho vâi kơdrâi Trường Sơn tung rôh tơplâ xâ Mih, tŏng xo tơnêi têa. Tối nhên, tơdroăng ki hlâ rêh dêi mâu vâi kơdrâi lêng Trường Sơn hiăng veăng kum kân kĭn rơtế ƀă hdroâng mơngế pro chiâng tơdroăng ƀlêi trâng khên tơnôu. Um méa dêi mâu vâi kơdrâi lêng cho djâ troăng ahdrối ăm mâu rơxông hơnăm ối nếo hâi kố hriâm tâp, tiô ƀối. Kăn xiâm phŏ hnê ngăn tơnêi têa rơhêng vâ mâu vâi kơdrâi lêng Trường Sơn pơtối pêi hnoăng cheăng tŏng kum mơhno hriâm tâp ăm mâu kuăn ‘nĕng, hơnăm ối nếo, nâ, o vâi kơdrâi a kong pơlê, tíu tơrŭm, tơ’noăng pêi cheăng kâ, hriâm tâp, mơjiâng tơdroăng rêh ối nếo.

Katarina Nga tơplôu ƀă tơbleăng