Kot mâ tung rơpŏng hngêi ai tơdroăng rêh ối kơtiê xơpá a kơpong hngế hngo Dà K’Nàng (tơring Dam Rông, kong pơlê Lâm Đồng), Ka Huệ hiăng pơtê hriâm tơdế rá drêng dế hriâm lâm 11, ối a hngêi pêi cheăng kum dêi nôu pâ. Dế 17 hơnăm ‘’Cho hơnăm dế rơdêi’’, ngế droh Ka Huệ tung hiâm tuăn dế rơhêng vâ pêi cheăng hlối hơhnâ môi tiah veăng pêi tơdroăng cheăng pơlê pơla.

A cheăm Dà K’Nàng tơnêi, hyôh kong prâi tơtro ƀă tơdroăng pêt priât Laba. Pái hơnăm hdrối, Khu pêi cheăng tơrŭm pêt priât Laba Dà K’Nàng châ mơjiâng a cheăm, Ka Huệ ‘măn lối 5.000m2 tơnêi vâ pêt priât tơrŭm khu pêi cheăng Tơrŭm. Xuân tung pơla kố, Ka Huệ mot pro kŏng nhân a khu pêi cheăng tơrŭm, ƀă rêm khế châ 7 rơtuh liăn, nâ ối mơhnhôk tơ’nôm 4 ngế droh tơtăm kuăn ngo tung cheăm veăng mot pêi cheăng a khu pêi cheăng tơrŭm, châ kâ liăn tơniăn.

Ka Huệ rơtế ƀă mâu vâi o thôn Pul

Pakiĭng hâi pêi cheăng a Khu pêi cheăng tơrŭm, cho kăn hnê ngăn thôn Pul, Ka Huệ mơdoh tăng tơkŭm mâu droh rơtăm tung pơlê veăng tơrŭm tokŭm hôp hnê tối tiô troăng rơhlâ dêi Đảng, luât tơnêi têa. Pakĭng mê hnê tối túa mơnhông cheăng kâ châ tơƀrê.

“Tơdroăng cheăng hnê tối mê ngin đi đo mơhnhôk mâu tơdroăng hnê tối dêi mơngế ki kân hnê ăm rơxông nếo. Ing mê, ngin chôa chê  ƀă mâu ngế cho droh rơtăm tung thôn tiô túa “chôa hnê i iâ, klêi mê hnê hên hdroh ah vâi kô loi’’. Tăng troăng vâ tơkŭm khu droh rơtăm tung pơlê môi tuăn dêi rơpó, tơmâng khât ‘na cheăng kâ, ví pro tơdroăng xôi luât. Troh mơ’nui khu Đoân Droh rơtăm  tokŭm hôp trâm mâ vâ hnê tối ăm dêi rơpó ví tơdroăng ôh tá tro, vâ pêi rế ‘ló, hnê túa pêi cheăng tơƀrê ăm mâu đoân viên. Môi tiah tơná á thế tơbleăng hnê châ tơƀrê hdrối, hlo kâi mơni kô pro pơxúa châ xo to’mot liăn hên ăm mâu droh rơtăm châ pêi lo liăn hên mê á kô tơbleăng hnê ăm mâu đoân viên pêi ƀối. A kố ngin dế tơbleăng hnê túa pêt loăng yâu păn hdrong, nôkố rêm sao pêt loăng yâu ƀă păn hdrong châ sap 7- 10 rơtuh liăn rêm khế’’.

Cho Kăn hnê ngăn Chi đoân droh rơtăm kơhnâ rơkê, Ka Huệ ối cho ngế pêi cheăng ‘na y tă thôn pơlê, hlối cho môi ngế kum pêi tơdroăng cheăng ngăn ‘na pơ’leăng mâ mơngế. Thôn Pul, cheăm Dà K’Nàng ai 120 rơpŏng, ƀă dâng 80% mâ mơngế hdroâng kuăn ngo K’ho. Xua ối hơngế hngo, kơpong xơpá mê ối râk túa tơlá ki ôh pá tro ton nah. Ka Huệ hiăng mơ-eăm hnê tối vâ kuăn pơlê tah lôi túa tơlá ton nah ki ôh pá tro, môi tiah rĕng xo dêi rơpó tá hâi tro hơnăm, xo dêi rơpó ối pơdjuôm môi mơheăm, môi hdrông hdrê, hnê thế kuăn pơlê hbrâ mơdât pơreăng, kâ tô ôu chên, kơhnâ trâ văng nhâ êa rơtôh tung tơdrum, mơgrúa lĕm hngêi trăng, klông troăng.

“Á cho kăn hnê ngăn Chi đoân thôn Pul, hlối pêi tơ’nôm tơdroăng cheăng. Hdrối nah hâi ai ngế pêi ‘na hnoăng cheăng rak ngăn pơ’leăng mâ mơngế, hâi châ hnê tối, hâi châ hnê mơhno mê tơdroăng droh rơtăm xo dêi rơpó tá hâi tro hơnăm, xo dêi rơpó ối mơdjuôm môi mơheăm môi hdrông hdrê hlo hên a thôn cheăm kố, môi tiah xo kuăn miê, kuăn tăm tuăn vâi tơmiât vâ pôi tá lui hdrông hdrê. La sap pêi tơdroăng hnê tối rơdêi ăm kuăn pơlê hlê nôkố tơdroăng mê hiăng kơdroh hên há.

Mâu droh rơtăm xo dêi kơdrâi lơ kơnốu kuăn ngo ki ê, môi tiah xo mơngế Xuăn, mơngế Cil ƀă mâu hdroâng kuăn ngo ki ê… Ôh pá ai xếo tơdroăng ai kuăn má 3. Má 4 môi tiah hdrối nah, mê nôkố kuăn pơlê hiăng ‘nâi ai kuăn preăng kuăn iâ kâi chĕm mơ’drêh dêi krâu khât. Drêng ai pơreăng châi tamo, hnê mơhnhôk kuăn pơlê thế lăm pâk pơkeăng mơdât pơreăng kuăn pơlê pêi pro ƀối’’.

Ka Huệ veăng pêi cheăng tung ‘’Hâi tĭng ngiât lĕm’’

Ƀă tơdroăng kơdôu mơ-eăm khât, tuăn tơmiât chân krá ‘na tơdroăng kal kí, apoăng hơnăm kố, Ka Huệ hâk ro tơná châ mot Đảng Cộng sản Việt Nam. Jâ Mbon K’Thơm Kăn phŏ hnê ngăn Vi ƀan cheăm Dà K’Nàng, tơring Dam Rông, kong pơlê Lâm Đồng ăm ‘nâi: Tung mâu hơnăm hdrối nah, Ka Huệ hiăng hbrâ tơrŭm ƀă mâu khu râ kơvâ cheăng thôn, cheăm vâ mơdêk hnê tối ‘na tơdroăng ki nếo ‘nâi ăm kuăn pơlê a pơlê kố vâ kuăn pơlê ‘nâi tơchĕng tơmiât túa pêi pro.

Malối cho hnê tối xut tah túa tơlá ton nah ki ôh pá tro ki xo dêi rơpó ối mơdjuôm môi mơheăm môi hdrông hdrê. Tơbleăng pơkâ mơjiâng thôn pơlê cheăng kâ rêh ối tiô túa nếo a kong pơlê, tơná Ka Huệ xuân môi tiah thôn Pul hiăng veăng ‘no hnoăng cheăng kơhnâ khât, veăng kum ăm cheăm Dà K’Nàng châ mơnhên tối cho thôn pơlê cheăng kâ tiô túa nếo.

“Ka Huệ cho môi ngế đảng viên hơnăm ối nếo, rơkê kơhnâ ƀeăn, ai tuăn tơmiât vâ mơ-eăm kơhnâ hriâm, cho môi ngế Kăn hnê ngăn chi đoân mê Ka Huệ đi đo pêi pro mâu troăng lĕm ahdrối tung mơnhông cheăng kâ dêi rơpŏng hngêi, cho đoân viên droh rơtăm a thôn cheăm, tung tơbleăng pêi mâu tơdroăng a thôn pơlê mê Ka Huệ pêi tro. Thôn, pơlê cheăm xuân hiăng tối kố cho ngế kơdrâi đoân viên ki rơkê vâ pơtối ăm hriâm tơ’nôm vâ mơnhông mơdêk tâ nếo tung khu đoân viên tối tơdjuôm đoân viên vâi kơdrâi hdroâng kuăn ngo tối krê’’.

‘’La lâi kal droh rơtăm ai mâ, alâi pá ai droh trơtăm troh’’. Rơkong hnê tối mê dêi Pôa Hồ hiăng châ mâu rơxông nếo a cheăm kơpong hngế hngo Dà K’Nàng, tơring Dam Rông, kong pơlê Lâm Đồng ối chôu pâ vâ pêi pro. Tung mê, tơná Ka Huệ - Kăn hnê ngăn Chi Đoân droh rơtăm thôn Pul, cheăm Dà KNàng cho môi ngế vâ mơhno ăm mâu ki ê hlo ƀối. Tơdroăng nâ pêi cheăng kơhnâ hiăng veăng kum iâ tơdroăng kal pro pơ’lêh tuăn tơmiât, túa pêi pro dêi nâ hiăng ‘no  pro pơ’lêh tơdroăng tơchĕng tơmiât, túa pêi pro dêi hơnăm ối nếo a thôn pơlê cheăm hơngế hơngo.