Hâi lơ 1/6, cho hâi vâi Lâp plâi tơnêi vâi ‘nĕng, drêng tơpui ‘na cheăng kâ rêh ối xuân môi tiah tơdroăng Kuô̆k hô̆i, hên mâu kăn pâ thế rêm râ, rêm kơvâ cheăng thế ai troăng rơhlâ pêi cheăng tơƀrê tung hbrâ, mơdât tôu pâm a hngêi trung, ‘nêk vâi ‘nĕng chiâng rong râ, malối cho hbrâ, mơdât klâk têa tung rơnó pơtê hriâm.

Tiô hên mau kăn tối, tung mâu hơnăm achê kố, khu ‘mêi ‘nêk mơ’nêa vâi hdrêng, malối tôu pâm a hngêi trung, tung rơpŏng hngêi, mơhé châ mơdât la xuân ối ai chiâng rơ-iô. Mâu kăn tối, kal thế mơdêk hbrâ mơdât tôu pâm, pro pơlăm pơlối vâi hdrêng tung mâu tơdroăng mơhno túa lĕm tro, tơ’noăng ivá, ôm hyô; pêi ahdrối pro tíu xah hêi ăm vâi hdrêng, tơdroăng túa lĕm tro, hơdruê xuăng, pơtâp ivá ăm vâi hdrêng râ cheăm, malối mâu cheăm kơtiê, cheăng kâ ối pá puât. 

Mâu kăn ki ‘nâ xuân tối, thế tơrŭm krá pơla nôu pâ ƀă hngêi trung ƀă pơlê pơla tung hnê tơdroăng rêh ối, ‘na tuăn ngôa, hiâm mơno, tơdroăng rêh ối ăm mâu hok tro kal châ tơmâng hên tâ. Mâu Tíu hnê hriâm kal mơdêk hnê tối vâ châ tơniăn ăm hok tro.

Kơxo hâi lơ 1/6, Kuô̆k hô̆i pơtối tơpui tơno a hngêi hôp kân, tối tơ’nôm tơdroăng pêi pro tiô pơkâ mơnhông cheăng kâ - rêh ối ƀă mơ’no hrê liăn ngân tơnêi têa hơnăm 2022; tơdroăng pêi pro pơkâ mơnhông cheăng kâ rêh ối ƀă liăn ngân tơnêi têa tung mâu khế apoăng hơnăm 2023; tơpui tơno a hngêi hôp kân ‘na troăng rơhlâ ‘no liăn cheăng tơ’nôm a kơxô̆ liăn pơkâ ăm hngêi rak liăn kum pêi chiâk ƀă mơnhông thôn pơlê Việt Nam.