Teăng mâ khu râ kăn pơkuâ Đảng, Tơnêi têa, Ngế pro xiâm hnê ngăn tơnêi têa pơtroh rơkong kơ-êng tá hiâm mơno ƀă rơkong rơkâu lĕm tro troh vâi krâ kuăn pơlê, mâu nôu, mâu nâ o vâi kơdrâi Việt Nam. Ngế pro xiâm hnê ngăn tơnêi têa mơnhên, Vâi kơdrâi Việt Nam ing mâu rơxông đi đo ai hnoăng ki phá tơ ê, ai hên tơdroăng veăng kum kân tung mơjiâng, gâk kring ƀă mơnhông mơdêk dêi tơnêi têa. Đảng ƀă Tơnêi têa đi đo tơmâng troh tơdroăng tơdâng tơ’mô pơla kơnốu kơdrâi ƀă xua tơdroăng ki rơkê dêi vâi kơdrâi ƀă hên troăng pơkâ pêi, troăng tơdjâ ‘na hnê mơjiâng, hnê tơ’nôm kăn ƀô̆ vâi kơdrâi, rak ngăn ivá, tŏng kum vâi kơdrâi tung tăng cheăng pêi, pơxiâm tăng cheăng pêi ƀă hía hé.

Ƀă mâu troăng pêi mê, Việt Nam hiăng mơjiâng tíu pêi cheăng, pro tơ’lêi hlâu vâ vâi kơdrâi thăm rế hía rế mơnhên tíu cheăng, hnoăng cheăng ƀă hên roh tơ’lêi veăng kum ăm rơpŏng, pơlê pơla ƀă rêh ối pơlê pơla. Laga, tiô Ngế pro xiâm hnê ngăn tơnêi têa pin ối hên tơdroăng cheăng thế pêi vâ ăm tơdroăng rêh ối lĕm tâ mê ăm mơngế vâi kơdrâi, vâ vâi kơdrâi ai roh tơ’lêi hlâu, ai ivá veăng kum ăm pơlê pơla, ăm tơnêi têa, vâ ôh tá lôi kơbố parŏng. Ngế pro xiâm hnê ngăn tơnêi têa tối nhên:

‘’Roh tơpui tơno cho vâ tơmâng, tối ăm dêi pó, rơtế dêi pó tơleăng ƀă rơtế ai hnoăng tung pêi pro mâu pơkâ tơdâng tơ’mô pơla kơnốu kơdrâi ƀă tơdroăng ki rơkê dêi vâi kơdrâi a 03 khu tơdroăng: Vâi kơdrâi ƀă mơnhông mơdêk cheăng kâ. Pin kal hvái ngăn mâu tơdroăng hiăng pêi, tá hâi pêi vâ pơtối ai mâu troăng vâ rak tơniăn, mơjiâng tơdroăng pêi cheăng, pleăng hnoăng cheăng dêi vâi kơdrâi.

Roh tơpui tơno ôh tá chiâng vâ tŏng kum tâi tâng mâu tơdroăng, laga pin thế hlê plĕng, đi đo tơleăng mâu tơdroăng ki nếo, tơdroăng mơ-eăm, khŏm mơ-eăm xông tơtêk’’.

Tâi tâng roh tơpui tơno

Ƀă hiâm mơno pôu râng hnoăng cheăng, tơdrăng, tá hiâm mơno, mâu kăn teăng mâ hiăng kơ-êng, tối tơdroăng pói vâ, pá puât, tơvâ tơvân. Ngế pro xiâm hnê ngăn tơnêi têa rơtế mâu khu xiâm, kơvâ cheăng tiâ ‘na mâu tơdroăng ối tơvâ tơvân, pá puât, tô tuăn dêi vâi kơdrâi lâp tơnêi têa. Ki rơhêng vâ tối cho ‘na tơdroăng po rơdâ ƀă mơngế tung ivá ki chiâng pêi pro vâ nâ o vâi kơdrâi châ mung kơxô̆ liăn tơ’lêi hlâu tâ, jâ Đỗ Thị Ninh ối tung Khu pơkuâ liăn ngân kŭn Tình Thương tíu pêi cheăng Nghi Lộc, kong pơlê Nghệ An tối:

“Vâ kơxô̆ liăn kŭn chiâng tơmeăm ki pơxúa kum châ tơƀrê pêi pro troăng hơlâ dêi Tơnêi têa tung kơdroh mung liăn ki liăn rơkâ hên, kơdroh kơtiê krá tơniăn, thăm pêi pro kơxô̆ liăn tŭm têk tơnêi têa, pơkâ thế Chin phuh ai troăng vâ po rơdâ ƀă mơngế  mung ƀă kơxô̆ liăn mung ăm mâu khu pơkuâ liăn ngân kŭn, tơdrêng amê tơmâng pro tơ’lêi hlâu tiô luât vâ mâu khu pơkuâ liăn ngân kŭn châ mơnhông mơdêk mơdró chêl kơxô̆ liăn pơtroh liăn’’.

Tiô pôa Phạm Minh Chính, Ngế pro xiâm hnê ngăn tơnêi têa thế Hngêi arak liăn tơnêi têa kal ai mâu troăng kơjo ƀă tŏng kum ăm khu tơrŭm cheăng kŭn châ po rơdâ tíu pêi cheăng ƀă po rơdâ mơngế châ achê mơngế vâ mung liăn vâ kơdroh tơdroăng lăm mung liăn a tíu ki liăn rơkâ kơnâ hên vâ mâu khu cheăng kâ kŭn châ mung kơxô̆ liăn rĕng má môi.

“Mâu ngế châ mung châ mâu khu ăm mung liăn kŭn kố ối iâ mê Hngêi arak liăn thế tơmiât pro ti lâi vâ po rơdâ mâu ngế mung po rơdâ kơlo mung hâi khế ăm mung ăm tơtro, mê nếo tối cho kơjo, ƀă drêng po rơdâ mê thế ai pơkâ tơniăn xing xoăng kơxô̆ liăn dêi mâu ngế châ mung ƀă kơdroh ăm mung a tíu ki xo liăn rơkâ kơnâ.

Nôkố vâ kơdroh mung a tíu ki xo liăn rơkâ kơnâ hên mê thế ai hên kơ koan, tung mê, ai mâu kơ koan cheăng veăng mot pêi cheăng laga hngêi arak liăn ƀă  hbrâ pro ti lâi nâ o pơtối châ mung ăm gá tơ’lêi hlâu tâ, tơ’lêi tâ ƀă gá tơniăn pơkâ dêi vâi, laga gá thế krá tơniăn vâ chêl liăn chĕn’’.

Ngế pro xiâm hnê ngăn tơnêi têa xông tơpui a Hneăng hôp

Pakĭng mê, hên kăn teăng mâ vâi kơdrâi hiăng kơ-êng tơdjâk troh mâu tơdroăng ‘na mâu troăng pêi vâ  vâi kơdrâi thôn pơlê veăng hên ƀă ai hên tơdroăng veăng kum tung tơdroăng mơjiâng thôn pơlê nếo; troăng pêi ki klâi vâ thăm mơnhông tơdâng tơ’mô tung kơvâ hriăn plĕng khoa hok Kŏng ngê̆; pơkâ thế Ngế pro xiâm hnê ngăn tơnêi têa hnê mơhno kơ koan cheăng thăm pêi pro mâu hlá mơ-éa vâ mơnhên ƀă chêh inâi ếo xŏn Việt Nam tung inâi khôi túa lĕm tro dêi tơnêi têa.