Pôa Martin Candinas, Kăn hnê ngăn Hô̆i đong Tơnêi têa Swiss hiăng troh Hà Nội pơxiâm rôh lăm pôu păng ‘nâng Việt Nam sap ing hâi lơ 27 troh 30/6 tiô rơkong krếo thế dêi pôa Vương Đình Huệ, kăn xiâm hnê ngăn Kuô̆k hô̆i. Rôh lăm pôu păng ‘nâng Việt Nam kố dêi Kăn xiâm hnê ngăn Hô̆i đong Tơnêi têa Swiss mơhno tơdroăng ki ngăn nhuô̆m dêi Swiss ƀă Việt Nam. Swiss rơhêng vâ mơdêk tơrŭm cheăng pơla péa tơnêi têa, malối cho kơvâ cheăng kâ, tê mơdró ƀă mơ-eăm tơmiât troh kĭ tơkêa tơrŭm cheăng Tê mơdró pơla Việt Nam ƀă Khu tơrŭm tê mơdró tơniăn krê châu Âu (EFTA).

Kố xuân cho tơdroăng cheăng tơpui kâ Kuô̆k hô̆i râ má môi ki kal vêh po tơdroăng tơpui tơno khu râ kăn xiâm pơla péa tơnêi têa klêi ai pơreăng kân COVID-19. Tung rôh lăm pôu, klêi kơ’nâi leh tơdah kăn xiâm hnê ngăn Hô̆i đong Tơnêi têa Swis Martin Candinas tơpui tơno ƀă pôa Vương Đình Huệ, Kăn xiâm hnê ngăn Kuô̆k hô̆i, koh tơpui tơno ƀă pôa Võ Văn Thưởng, Kăn xiâm hnê ngăn tơnêi têa ƀă tơpui tơno ƀă pôa Phạm Minh Chính, Ngế pro xiâm hnê ngăn Chin phuh; pêi cheăng ƀă pôa Nguyễn Hồng Diên, ngế xiâm ngăn kơmăi kơmok ƀă tê mơdró.