Tâi tâng mâu ngế ki pơkuâ djâ tung rôh bro ôh tá tơniăn a Dak Lak hiăng tro khu ki ai tơdjâk rup kroăng; nôkố tơdroăng rêh ối cheăng kâ a tơring Čư̆ Kuin hiăng vêh tơniăn tiah hmâ nếo. Kố cho tơdroăng ki tối tơbleăng châ mơ’no tối a Rôh hôp tơbleăng Tơnêi têa khế 6/2023, xua Khu pơtâng tối tơdroăng kal Tơnêi têa tơkŭm po a kơxo lơ 16/6.

A rôh hôp, tơbleăng rĕng rôh ki pro ôh tá tơniăn a Dak Lak, Thiê̆u tươ̆ng Đặng Hồng Đức, Kăn pơkuâ Ƀơrô Kăn xiâm ngăn Kŏng an tối nhên, klêi kơ’nâi ai tơdroăng xâu xía kố, Khu xiâm ngăn Kŏng an hiăng rĕng pơtroh mâu khu ki pêi dêi hnoăng cheăng, tơbleăng tơdâng tơ’mô mâu troăng hơlâ gak tâ tá, hbrâ mơdât a mâu cheăm tơring ki ai tơdjâk troh, rak vế tíu pêi cheăng, rak vế tơniăn gâk kring, tơniăn ăm kuăn pơlê ƀă tí tăng rup mâu ngế ki bro xôi.

Rơtế amê, rĕng pêi pro mâu troăng hơlâ tŏng kum, teăm lăm pôu kơ-êng mơhnhôk rơpŏng ki ai mâu ngế hlâ, tro rong; pôu kơ-êng mơhnhôk rơpŏng kăn ƀô̆, kuăn pơlê ki trâm xía vâ. Thiê̆u tươ̆ng Đặng Hồng Đức tối nhên, ƀă hiâm mơno pêi pro kơtăng rôh tăng rup mâu ngế ki bro xôi, troh nôkố khu kŏng an hiăng châ rup mâu ngế ki bro xôi ki veăng tơdrêng tung rôh ai tơdroăng ki xía vâ.

Klêi kơ’nâi tí tăng apoăng, kơxô̆ ngế ki tro rup kroăng ki hên cho mâu ngế hơnăm ối nếo, pêi pro tơdroăng xôi xua tro mơhnhôk thế, pơlông djâ ing măng ƀă mơhnhôk thế bro tơklâ pơla mơngế Xuăn ƀă mâu kuăn pơlê hdroâng kuăn ngo ƀă hên ki ê.

Xiâm kối xua tuăn tơmiât ki pro ôh tá tơniăn dêi mâu khu ‘mêi, ai mâu ngế Fulro ki reh ối a kong têa ê mơhnhôk mâu kuăn pơlê hdroâng kuăn ngo tơklâ pơla mơngế Xuăn ƀă hdroâng kuăn ngo pro ôh tá tơniăn ƀă hiăng bro tơdroăng ki ô eăng, bro tơdroăng ki ôh tá ai khât a kong têa ê. Tơdroăng kố, khu Kŏng an dế pơtối séa ngăn, pro nhên.

‘Na túa tơmiât, troăng hơlâ pơkâ tung la ngiâ, Thiê̆u tươ̆ng Đặng Hồng Đức tối nhên, Khu xiâm ngăn Kŏng an kô pơtối tăng rup mâu ngế ki bro xôi. Tơdrêng amê hlối rak vế tơniăn khât ăm kuăn pơlê ƀă khu ki veăng tăng rup; pêi pro hnoăng cheăng séa ngăn, pơxâu phak rĕng tro tiô pơkâ. Khu xiâm ngăn Kŏng an pơkâ thế rêm râ pơkuâ Đảng, khu kăn pơkuâ kong pơlê Dak Lak, mâu kong pơlê Tây Nguyên ƀă mâu kong pơlê ki a chê malối tơmâng ngăn pêi pro tro hnoăng cheăng hnê mơhnhôk, ‘nâi nhên ‘na kuăn pơlê, achê kuăn pơlê, teăm châ ‘nâi mâu tơdroăng ki hêng hôu tung mâu kuăn pơlê vâ rĕng pơkâ tơleăng, sap ing xiâm kối ƀă mơdêk hbrâ kơchăng dêi khu lêng ƀă kuăn pơlê ‘na tơdroăng ki pơlông djâ pêi pro mâu tơdroăng ki ôh tá tơniăn, djâ bro tơklâ tơdroăng tơrŭm tâi tâng khu kuăn pơlê hdroâng kuăn dêi mâu khu ‘mêi tơtrâ tơnêi têa, mơdêk tơdroăng tơ’noăng tâi tâng kuăn pơlê veăng rak vế, gak kring Tơnêi têa.