Leh tơbâ 98 hơnăm Hâi hlá tơbeăng kăch măng Việt Nam (21/6), khu râ kăn pơkuâ kong pơlê Dak Lak hiăng troh lăm pôu ƀă rơkâu Kơ koan teăng mâ Rơ’jíu Việt Nam kơpong Tây Nguyên. Teăng mâ khu râ kăn pơkuâ kong pơlê Dak Lak, pôa Nguyễn Đình Trung, Kăn pơkuâ hnê ngăn cheăng Đảng kong pơlê pơtroh rơkong lĕm tro troh kăn ƀô̆, kŏng chưk, viên chưk, mơngế pêi cheăng dêi Rơ’jíu Việt Nam Kơ koan teăng mâ a kơpong Tây Nguyên, rơkâu mâu tơdroăng châ tơƀrê pêi pro hnoăng cheăng tơbleăng tơdroăng kal ki Rơ’jíu Việt Nam tối tơdjuôm ƀă Kơ koan teăng mâ kơpong Tây Nguyên tối krê châ tơƀrê tung pơla kố nah.

Pôa Nguyễn Đình Trung tối, rơtế ƀă tơdroăng mơjiâng ƀă mơ’no mâu tơdroăng kal, ƀai tơdroăng kal, Kơ koan teăng mâ ối pêi pro mơjiâng, mơ’no 6 nâl tung tâi tâng kơxô̆ 13 nâl hdroâng kuăn ngo Rơ’jíu Việt Nam cho tơxâng khât ƀă tơdroăng ki kal la ngiâ.

Kố cho môi tơdroăng pơtâng tối troăng hơlâ dêi Đảng, Tơnêi têa troh vâi krâ kuăn pơlê hdroâng kuăn ngo tơtro khât ƀă châ tơƀrê veăng kum kal khât tung tơdroăng mơnhông tơdjuôm dêi kong pơlê.