A rôh hôp, Vi ƀan Măt trâ̆n tơnêi têa Việt Nam kong pơlê Dak Lak hiăng tơbleăng tơdroăng rêh ối cheăng kâ dêi mâu ngế ki lo tơbriât pro kăn. Ing mê, tíu tâ phĭu kơxô̆ 4 ai 5 ngế lo tơbriât pro kăn Kuô̆k hô̆i; tíu tâ phĭu kơxô̆ 22 ai 5 ngế lo tơbriât pro Kăn hnê ngăn Hô̆i đong Kuăn pơlê dêi kong pơlê.

Mâu ngế lo tơbriât mê hiăng tối tơdroăng cheăng tơná, tơkŭm a mâu tơdroăng vâ mơnhông cheăng kâ-rêh ối pơlê pơla, mơnhông tơdroăng rêh ối dêi kuăn pơlê, malối a kơpong kuăn ngo; mơdêk ‘mâi hơ’lêh pêi cheăng pro hlá mơ-éa, pơ’lêh kơxô̆ ƀă mơdêk séa ngăn tơdroăng cheăng pêi tro tiô luât.

Tơbleăng a ngiâ kuăn pơlê, pôa Lương Nguyễn Minh Triết, Ngế cheăng tung Tíu xiâm Đảng, Kăn pơkuâ hnê ngăn Đảng ủi kong pơlê Dak Lak tối, tâng kuăn rah xo ro kăn hnê ngăn Kuô̆k hô̆i hneăng 16 kô mơ-eăm pê tâi hnoăng cheăng  dêi ngế kuăn pơlê rah xo, mơ-eăm tơpui tơno ƀă kuăn pơlê, ƀă kuăn pơlê teăm, tối mâu tơdroăng pâ thế, púi vâ ki tơxâng troh mâu kơ koan râ kơpêng.