A Tíu pêi cheăng tơkŭm môi tíu bêng Ea Kao, ‘mot tơkŭm sap ing cheăm Ea Kao ƀă bêng Ea Tam, kong pơlê Dak Lak, tung hâi ki pêi mơnúa, kuăn pơlê troh pro mơ-éa châ vâi pro ăm rĕng, rơkê. Jâ H’Đinh Ƀuôn Krông (jâ Y Sam), ối a ƀuôn Alê B, tối drêng tơdrăng klêi pro klêi mâu mơ-éa ăm tơdroăng ki ăm vâi mung veăng ối:

“Tơdroăng ki cheh pro, mơdrếo mâu mơ-éa klêi kơ’nâi ‘mot tơkŭm mê á hlo mâu kăn ƀô̆ akố xuân tơdah xo tơpui tó hơniâp ro, tŏng gum kuăn pơlê tâi hiâm mơno tung tơdroăng ki chêh pro mâu mơ-éa. Mơ-éa ki chêh pro mơdrếo gá rĕng, á hlo hên tơdroăng ki pơhlêh”.

Ki khât tơbleăng pêi mơnúa a mâu kong pơlê Dak Lak, Lâm Đồng, Gia Lai, tíu cheăng chêh pro mơ-éa hiăng chêh pro mơ-éa ăm kuăn pơlê tơ’lêi hlâu. Lăm séa ngăn tơdrêng vâ ‘nâi mâu tơdroăng, pôa Nguyễn Đình Trung, kăn pơkuâ hnê ngăn Đảng Dak Lak, pơkâ thế:

“Pin tối pêi mơnúa ngăn la tơdroăng ki tơbleăng pêi mê gá khât. Kố cho tơdroăng ki hbrâ vâ troh hâi lơ 1/7 pin pêi khât hlối. Xua mê, pó pêi cheăng ki lâi mê athế hbrâ rơnáu ƀă pêi. Tôh hnê mơhno mê kong pơlê mơjiâng mê ki xiâm cho tŏng gum mâu vâi pú ƀă athế ‘nâi nhên tơdroăng vâ ngăn hôm ối tung pơla pêi mê hôm ai xơpá klâi, tơvâ tơdroăng klâi vâ drêng hôp ah pôi tá pêi tiah mê xếo, chêh tơkŭm vâ tơpui tơno ƀă dêi rơpó”.

A Gia Lai, cheăng klâ xoăng, pro lế lĕm tíu pêi cheăng, tơbleăng túa pêi kăn pơkuâ kong pơlê 2 râ, hiăng pêi kơtăng. Pôa Hồ Văn Niên, kăn pơkuâ hnê ngăn Đảng Gia Lai, tối nhên:

“Tâi tâng khu pơkuâ tơdroăng kal kí dêi kong pơlê dế tơkŭm tơbleăng túa kăn pơkuâ kong pơlê péa râ châ pêi tơdâng tơ’mô sap ing hâi lơ 1/7. Pakĭng mê, kong pơlê dế mơdêk rơdêi hên troăng pơkâ kân môi tiah môi tiah thăm mơnhông mơdêk pơhlêh kơxô̆, xúa khoa hok kong ngê̆, tŏng gum mâu tơdroăng ki tơvâ tung xo tơnêi, mơdêk rĕng tơdroăng ki ‘no liăn pêi cheăng tơnêi têa ƀă tơbleăng mâu tơdroăng tơkêa pro ki kal vâ rak vế tơniăn ki mơnhông tung hơnăm 2025 ƀă pro chiâng ivá krá rơdêi ăm hneăng pêi cheăng ki nếo”.

A Dak Nông, drêng pêi mơnúa tíu cheăng kăn pơkuâ râ cheăm nếo hlo tơniăn tro, kuăn pơlê loi tơngah khât tung tơdroăng ki xing xoăng, ‘mot tơkŭm tíu pêi cheăng. Jâ H’Thương, ối a cheăm Nâm Nung, tối:

“’Mot tơkŭm kong pơlê Bình Thuận, Dak Nông ƀă Lâm Đồng tiô á ngăn hlo gá tro. Pin ai tŭm tơdroăng mơnhông cheăng kâ tŭm kơvâ, ai kong, ai têa kơxĭ; môi tiah Dak Nông ai nhôm bauxite; Lâm Đồng ai ôm hyô Đà Lạt ki châ vâi ô eăng vâ mơnhông. Bình Thuận mơnhông ‘na cheăng kâ a têa kơxĭ, ai mâu tơmeăm ki hlâu ‘na ká xi xŏng môi tiah, xi xŏng, kơteăm, ká, mưk ƀă hên ki ê. Tiah mê, 3 to kong pơlê ‘mot tơkŭm môi mê chiâng cheăng kâ rêh ối pơlê pơla rế hía rế mơnhông”.

A kong pơlê Lâm Đồng nếo, tâi tâng tung pơla pêi mơnúa châ séa ngăn krâu. Pôa Y Thanh Hà Niê Kdăm, kăn pơkuâ ngăn Đảng Lâm Đồng, tối rơdêi, mâu tơdroăng ki tơvâ tơvân, tá hâi tro ‘ló châ ‘mâi mơnhông pêi tơdrêng hdrối vâ tâi tâng 124 to cheăm, bêng, kơpong păng ‘nâng mot pêi cheăng.

“Pêi pro klêi tơdroăng xoăng pơtroh kăn ƀô̆, kong chưk, viên chưk, ngế pêi cheăng ôh ti pêi môi tíu troh a tíu pêi cheăng a tíu pêi cheăng nếo. Đảng ủi Vi ƀan hnê ngăn kong pơlê, kăn pơkuâ Vi ƀan hnê ngăn kong pơlê pơkâ thế pêi pro klêi hnoăng cheăng hbrâ rơnáu ‘na mâu kế tơmeăm xúa, kơmăi kơmok, troăng mơ’no hyôh hrik mơ’no phần mềm vâ xúa tung pêi cheăng, tíu pêi cheăng, rak vế pêi pro hnoăng cheăng sap ing kong pơlê troh cheăm, bêng, kơpong tơdâng tơ’mô sap ing hâi lơ 1/7/2025”.