Drêng troh Tĭng kân Phật đản – Phật lịch 2567 – Dương lịch 2023, kơxo lơ 31/5, khu kăn ki pêi dêi hnoăng cheăng dêi Khu pơkuâ ngăn Đảng, Hô̆i đong hnê ngăn, Vi ƀan hnê ngăn, Vi ƀan Măt trâ̆n Tơnêi têa Việt Nam kong pơlê Dak Lak hiăng troh pôu, rơkâu Khu pơkuâ tơdroăng khôp Phop Việt Nam kong pơlê ƀă mâu hngêi khôp phop. A mâu tíu troh pôu, kăn pơkuâ kong pơlê Dak Lak tơmâng xo ƀă mơnhên tối khât mâu tơdroăng ki veăng kum dêi Khu khôp Phop ƀă hnoăng cheăng rak vế, mơjiâng ƀă mơnhông tơnêi têa ƀă kong pơlê.

Mâu ƀok jâ Phop, mâu ngế ki hriâm vâ bro yah ƀok Phop hiăng veăng tung mâu tơdroăng cheăng pơlê pơla, tŏng kum tơmeăm khoăng, pleăng hnoăng cheăng ăm kuăn pơlê ki tro kong mê khía mơhot têa kân lân lu, veăng tung hnoăng cheăng kơdroh kơtiê, mơjiâng bro hngêi tuăn pâ, ing mê veăng kum rơtế ƀă khu râ Đảng, khu kăn pơkuâ, pêi pro ƀlêi chiâng mâu tơdroăng ‘na cheăng kâ rêh ối pơlê pơla.

Kăn pơkuâ kong pơlê Dak Lak rơhêng vâ, ƀă ivá khŏm mơeăm dêi mâu yah ƀok, mâu ngế ki hriâm vâ bro yah ƀok Phop, Khu pơkuâ tơdroăng khôp Phop Việt Nam kong pơlê Dak Lak pơtối ai mâu tơdroăng ki veăng kum mơdêk khôi hmâ pâ nhuô̆m tơnêi têa, mơdêk tơdroăng tơrŭm, hơniâp lĕm vâ mơjiâng kong pơlê rế hía rế kro mơdrŏng.