A pơlê kong xiâm Suva, pôa Nguyễn Văn Trung, Kăn teăng mâ Việt Nam a New Zealand, hlối pơkuâ 3 to rơlố peăng hdroh Thái Bình Dương hiăng pơtroh kơthô dêi pôa Võ Văn Thưởng, Kăn xiâm hnê ngăn tơnêi têa ăm pôa Ratu Wiliame Maivalili Katonivere, kăn xiâm pơkuâ kŏng hòa Fiji. Kăn xiâm pơkuâ Fiji rơkâu Việt Nam ‘na mâu tơdroăng ki pêi pro tơƀrê tung hbrâ mơdât ƀă pơreăng kân COVID-19 ƀă ki rơdêi ‘na ‘mâi mơnhông ƀă mơdêk cheăng kâ nôkố.

Fiji rơhêng vâ tơrŭm cheăng ƀă hriâm ƀối ki rơkê plĕng ing Việt Nam tung mâu kơvâ cheăng ki Việt Nam ai ivá rơdêi ki nếo tối a kơpêng ƀă Fiji kơjo kum khât nôkố tung tơrŭm cheăng ƀă kong têa ê. Kăn teăng mâ tối rơhêng vâ péa pâ rĕng ai mâu hlá mơ-éa pêi pro tơtro luât, pro chiâng tơdroăng ki tơrŭm cheăng tơƀrê pơla péa tơnêi têa tung mâu kơvâ cheăng tê mơdró, ‘no liăn cheăng, liăn ngân, xuân môi tiah tơdjâk troh tơdroăng ki prôk lăm dêi kuăn pơlê péa tơnêi têa.

Kăn teăng mâ xuân pâ thế Fiji pro tơ’lêi hlâu ăm mơngế Việt Nam dế rêh ối a Fiji xuân môi tiah mâu khu mơdró kâ Việt Nam dế tơrŭm cheăng, pêi cheăng kâ a chuăn rơlố kố.