VOV4.Xơ Đăng - Kơxê lơ 6/10, a Hà Nội, khu râ kăn teăng mâ Đảng tơnêi têa pin xua pôa Lê Hoài Trung, Kăn cheăng tung Khu xiâm Đảng, Kăn xiâm tơpui kâ ƀă kong têa ê pơkuâ xiâm hiăng veăng hôp mơ’no tơdrêng tung um tiô troăng hyôh măng Hneăng hôp khu tơrŭm Đảng lâp plâi tơnêi xua Đảng kong têa Rusi Thống nhất pơkuâ tơkŭm po a Sakhalinsk.

Tâi tâng hneăng hôp a tíu mơ’no hyôh Hà Nội

Xông tơpui a Hneăng hôp, pôa Lê Hoài Trung tối mâu tơdroăng xiâm tung troăng pơkâ pêi, troăng hơlâ mơnhông krá tơniăn dêi Việt Nam; mơnhên troăng hơlâ mơnhông mơdêk krá tơniăn dêi Việt Nam nếo tối mâu troăng pêi tơdjuôm tơtro dêi lâp plâi tơnêi nếo xúa, mơjiâng tơtro pơkâ i nhên dêi Việt Nam ƀă pơkâ pêi đi đo cho mơ-eăm mơjiâng pơlê pơla xah hô̆i chuh ngiah ‘’Kuăn pơlê kro mơdrŏng, tơnêi têa rơdêi, kuăn pơlê pơkuâ dêi hnoăng cheăng, tơdâng tơ’mô, rơkê’’; tơpui tơno mâu troăng vâ thăm tơrŭm lâp plâi tơnêi xua pơkâ xiâm mơnhông mơdêk krá tơniăn, gâk ngăn loăng pơlái, kong kế kong prâi ƀă kuăn mơngế ƀă tơrŭm cheăng pơla mâu đảng ki pơkuâ hnê ngăn cheăng kal kí.

VOV/Tơplôu: A Sa Ly