VOV4.Xơ Đăng - A tíu pêi cheăng Khu lâp kong têa a New York, kong têa Mih, pôa António Guterres, Kăn xiâm chêh tôm xo rơkong Khu lâp kong têa hiăng tơdah pôa Đặng Hoàng Giang, Kăn teăng mâ, Kăn pơkuâ hnê mơhno má môi Việt Nam a Khu lâp kong têa. Kăn xiâm chêh tôm xo rơkong rơkâu Việt Nam hiăng châ mot tung Hô̆i đong hnoăng pơkuâ kuăn mơngế dêi Khu lâp kong têa hneăng hơnăm 2023 – 2025, loi tơngah Việt Nam kô pơtối veăng kum hên, châ tơƀrê tung tơdroăng thăm pêi pro rơdêi ƀă gâk kring hnoăng kuăn mơngế.

Pôa Đặng Hoàng Giang, Kăn teăng mâ tơnêi têa Việt Nam prế pôa António Guterres, Kăn xiâm chêh tôm xo rơkong Khu lâp kong têa

Kăn xiâm chêh tôm xo rơkong Khu lâp kong têa phiu ro mơnhên pôa kô lăm pôu pêi cheăng a Việt Nam klăng roh leh tơbâ 45 hơnăm Việt Nam mot tơrŭm Khu lâp kong têa 1977 – 2022. Pôa Đặng Hoàng Giang tối nhên ki kal dêi roh lăm pôu pêi cheăng dêi Kăn xiâm chêh tôm xo rơkong, mơnhên Việt Nam tơkêa mơ-eăm veăng kum hên ăm tơdroăng cheăng tơdjuôm dêi Khu lâp kong têa, tung mê, ai thăm pêi pro rơdêi mâu Pơkâ mơnhông mơdêk krá tơniăn, hbrâ ví kong prâi hơ’lêh ƀă rak hơniâp lĕm, gâk kring lâp plâi tơnêi.

VOV/Tơplôu: A Sa Ly