Kơxo hâi lơ 27/6, a Hà Nội, Leh lăm pôu, Leh tơbâ pôa Vũ Khoan, Kăn hnê ngăn Tíu xiâm Đảng, Ngế pro xiâm phŏ hnê ngăn Chin phuh hneăng hdrối châ tơkŭm po  tiô tơdroăng Leh mơdâm kiâ râ xiâm Tơnêi têa.  Klăng 8h, leh lăm pôu ngăn pôa Vũ Khoan châ po krip, nhoăm pâ vâ mơhno hiâm mơno mơjo pâ ƀă mơnê hnoăng pôa hiăng veăng ‘no tung pơla ối rêh.

Pơxiâm leh pôu ngăn, Khu xiâm kăn pơkuâ hnê ngăn Đảng, Khu kăn Kuô̆k hô̆i, Khu kăn xiâm hnê ngăn tơnêi têa, Khu kăn Chin phuh, Khu kăn Vi ƀan xiâm Măt trâ̆n tơnêi têa Việt Nam xua mâu kăn xiâm Đảng  Tơnêi têa  pơkuâ djâ lăm pôu ngăn. Troh pôu ngăn pôa Vũ Khoan ối ai mâu kăn xiâm Đảng, Tơnêi têa hneăng hdrối, mâu khu xiâm, kơvâ cheăng, Tíu xiâm ƀă mâu kong pơlê, tơring; mâu khu kăn tơpui kâ, vâi pú mâu kong têa ê.

Pôa Vũ Khoan, Ngế pro xiâm phŏ hnê ngăn hiăng veăng ‘no hnoăng ki kal tung tơdroăng pơxiâm tơrŭm cheăng ƀă mâu kong têa ê, hơ’lêh nếo ƀă mơnhông mơdêk cheăng kâ dêi tơnêi têa. Pôa hiăng ‘măn ăm ‘nâi mâu túa pêi cheăng ki kơnía git, mơjiâng túa tơpui tơno ‘na cheăng kâ ƀă lâp plâi tơnêi kơ’nâi mê. Leh tơbâ pôa Vũ Khoan po a 13 chôu 30phut ƀă lăm ‘mé a 15 chôu hâi ki mê a i lâng kiâ Mai Dịch, pơlê kong kân Hà Nội.