Hâi lơ 2/6, a pơlê kong kân Pakse, kong pơlê Champasak, peăng hdroh kong têa Lếo, Kăn xiâm teăng mâ Việt Nam a Pakse tơkŭm po Leh diâp tơmeăm dêi pôa Vương Đình Huệ, Kăn xiâm hnê ngăn Kuô̆k hô̆i ăm kuăn pơlê mơngế Việt Nam ki rêh ối a 4 to kong pơlê peăng Hdroh kong têa Lếo. A rôh leh, Kăn xiâm teăng mâ hiăng hbru 2 tâ̆n tơmeăm xúa vâ xúa tung tơdroăng hnê ƀă hriâm Tiếng Việt ăm kuăn ‘nĕng mơngế Việt Nam ki rêh ối a 4 to kong pơlê peăng Hdroh kong têa Lếo mê cho kong pơlê Champasak, Attapeau, Salavanh ƀă Sekong.

Tối tơbleăng a kố, pôa Nguyẽn Văn Trung, Kăn xiâm teăng mâ Việt Nam a Pakse tối nhên, kố cho tơdroăng tơmâng khât dêi Đảng, Tơnêi têa, malối dêi pôa Vương Đình Huệ, Kăn xiâm hnê ngăn Kuô̆k hô̆i ƀă kuăn pơlê mơngế Việt Nam ki rêh ối a 4 to kong pơlê peăng Hdroh kong têa Lếo; mơhno troăng rơhlâ luât pơkâ môi tuăn ƀă plâ mâu hơnăm dêi “Đảng ƀă Tơnêi tea Việt Nam đi đo ngăn mơngế Việt Nam a kong têa ê cho môi khu ki ôh tá chiâng tơkâ ing kuăn pơlê mơngế Việt Nam”.