Kăn xiâm hnê ngăn Kuô̆k hô̆i hiăng lăm pôu Hngêi kơmăi kơtâu ƀă ƀă on tơhrik Xioami ƀă Grup pơkuâ Thị Nguyên (CVTE); lăm ngăn kơpong mơđah tơbleăng tơmeăm, tíu mơjiâng pro rơxế kơtâu ƀă on tơhrik rơtế mâu tơmeăm um man hinh xúa kŏng ngê̆ AI tung mâu kơvâ cheăng dêi CVTE.

Kăn xiâm hnê ngăn Kuô̆k hô̆i tối hâk ro ƀă kheăn kơdeăn mâu tơdroăng châ tơƀrê mơnhông tơtêk dêi Xiaomi ƀă CVTE; tối ăm ‘nâi, Việt Nam đi đo sôk ro mâu khu tê mơdró kŏng ngê̆ ối má môi troh ti tăng ‘nâi rôh tơ’lêi mơ’no liăn cheăng, po rơdâ tơrŭm cheăng, ki má môi cho tung kơvâ rơxế on tơhrik, hmốu, kơmăi rak on tơhrik, kế tơmeăm ki rơkê xua kuăn mơngế pro, chiâng pro xêh ƀă mơnhông tơdroăng ki mơjiâng pro.

Pôa Trần Thanh Mẫn, Kăn xiâm hnê ngăn Kuô̆k hô̆i mơnhên, Kuô̆k hô̆i Việt Nam đi đo tơmâng kêi đeăng luât, hơlêh pro i lĕm tíu mơ’no liăn cheăng, tê mơdró tiô troăng tơdrăng, tơniăn ƀă tơ’lêi hlâu, tơniăn hnoăng pơxúa tơtro luât dêi khu mơ’no liăn cheăng; hbrâ tơmâng mâu rơkong pâ thế tơxâng dêi khu tê mơdró, pơtối kêi đeăng luât, pro tơ’lêi hlâu ăm khu tê mơdró kong têa ê mơ’no liăn cheăng ƀă tơdroăng pêi cheăng ton xŏn, châ tơƀrê a Việt Nam, ing tiô luât ƀă tơniăn tơtro pơla ki pơxúa pơla rêm pâ.