Kơxo hâi lơ 14/6, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i ƀă pôa Trần Thanh Mẫn, Kăn xiâm phŏ hnê ngăn Kuô̆k hô̆i pơkuâ hâi pêi cheăng dêi kăn Kuô̆k hô̆i ƀă Khu kăn séa ngăn Vi ƀan Pơkuâ cheăng Kuô̆k hô̆i ‘na tơdroăng “ Pêi pro tiô pơkâ kơxô̆ 88 ƀă Pơkâ kơxô̆ 51 dêi Kuô̆k hô̆i ‘na hơ’lêh nếo tơdroăng, hlá mơ-éa hriâm râ phôh thong”. 

Tối tơbleăng a rôh hôp, pôa Vương Đình Huệ kăn xiâm hnê ngăn Kuô̆k hô̆i  ăm ‘nâi, Kố cho môi tung 4 tơdroăng kal séa ngăn dêi Kuô̆k hô̆i, Vi ƀan pơkuâ Kuô̆k hô̆i tung hơnăm 2023. Klêi kơ’nâi 9 khế séa ngăn hiăng ai 63 khu kăn Kuô̆k hô̆i, 48 Hô̆i đong hnê ngăn rêm râ kong pơlê hiăng tơbleăng tơdroăng tơdjâk troh  mê.

Kăn xiâm hnê ngăn Kuô̆k hô̆i tối nhên, hlá mơ-éa pơkâ cho tơdroăng ki má mơ’nui dêi khu kăn séa ngăn, xua mê, kal thế tối nhên tơdroăng ki tro, ki hâi tro, ki u ối, ki hâi pêi, ki pêi ôh tá tro, ki pro xôi, ki xiâm gá ing lâi, lơ tơngôu, lơ ôh tá pêi, hnoăng cheăng mê ti lâi ƀă Khu kăn séa ngăn tối tơbleăng pâ thế  ki klâi? Mâu tơdroăng mê cho xiâm vâ Khu kăn pơkâ thế mâu kơ koan, khu tơrŭm cheăng pêi pro.