VOV4.Xơ Đăng - Pơtối rôh pêi dêi hnoăng cheăng a mâu kong pơlê Nam Trung Bộ, kơxê lơ 26/7, pôa Vương Đình Huệ, kăn xiâm hnê ngăn Kuô̆k hô̆i ƀă khu kăn ki pêi dêi hnoăng cheăng hiăng pêi cheăng ƀă Khu pơkuâ ngăn Đảng Quảng Ngãi. Tiô tối tơbleăng dêi kăn pơkuâ kong pơlê Quảng Ngãi, tơdroăng ki mơdêk GRDP hơnăm 2021 châ 6,05%; 6 khế apoăng hơnăm châ 6,34%.

Kăn xiâm hnê ngăn Kuô̆k hô̆i Vương Đình Huệ pêi cheăng ƀă Khu pơkuâ ngăn Đảng Quảng Ngãi

Kơvâ pêi chiâk deăng pơtối cho ivá xiâm ăm mơdêk xiâm ‘na tơdroăng cheăng kâ dêi kong pơlê; ôm hyô, tê mơdró hlo hơ’lêh tơƀrê khât; nâp liăn ăm tơnêi têa pơtối tâk hên, tơkâ luâ 51,1% tơdroăng pơkâ Tơnêi têa pơcháu; 6 khế apoăng tiô riân vâ chê 17 rơpâu rơtal liăn.

Môi tiăn ƀă túa pơkâ, hnoăng cheăng dêi kong pơlê tung la ngiâ, pôa Vương Đình Huệ pơkâ thế, kong pơlê Quảng Ngãi pơtối hơ’lêh nếo, rơkê, mơ-eăm pêi pro ƀlêi chiâng mâu hnoăng cheăng kal kí dêi kong pơlê; tơkŭm tơbleăng mâu tơdroăng tơkêa, xúa mâu tơdroăng ki pơxúa dêi kong pơlê mơnhông mơdêk; păn roăng tơdroăng ki rơhêng vâ mơ-eăm chiâng kong pơlê ki chía niân tiô tơdroăng ki rơhêng vâ  dêi pôa Phạm Văn Đồng, Ngế pro xiâm hnê ngăn tơnêi ki hiăng hlâ, vâ Quảng Ngãi chiâng môi tung mâu tíu xiâm mơnhông mơdêk dêi peăng tơdế Tơnêi têa.

Katarina Nga tơplôu ƀă tơbleăng