VOV4.XơĐăng - Kơxê măng lơ 20/7, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i tơdah pôa Sounthone Xayachak, Kăn xiâm pơkuâ hnê ngăn Đảng, Kăn xiâm phŏ Khu pơkuâ Đảng ƀô̆ Kuô̆k hô̆i Lếo, Kăn xiâm phŏ hnê ngăn Kuô̆k hô̆i, Kăn xiâm hnê ngăn Khu râ kăn Kuô̆k hô̆i râ má môi nhŏng o Việt Nam – Lếo ƀă Khu râ kăn teăng mâ Kuô̆k hô̆i Lếo troh lăm pôu pêi cheăng a Việt Nam. Pôa Vương Đình Huệ kheăn kơdeăn roh lăm pôu dêi Kăn xiâm phŏ hnê ngăn Kuô̆k hô̆i kong têa Lếo drêng tro roh péa tơnêi têa tơkŭm po 60 hơnăm Hâi mơjiâng tơrŭm cheăng tơpui kâ.

Pôa Vương Đình Huệ kheăn kơdeăn tơdroăng mơ-eăm nếo dêi Lếo tung pơla kố nah. A roh tơdah, pôa Vương Đình Huệ ƀă Kăn xiâm phŏ hnê ngăn Kuô̆k hô̆i Lếo vâ môi tuăn, tung la ngiâ, péa pâ thăm tơpui tơno khu râ kăn xiâm, mâu Viƀan, mâu khu kăn Kuô̆k hô̆i râ má môi nhŏng o, Hô̆i đong kuăn pơlê mâu kong pơlê, ki má lối cho mâu kong pơlê pro nhŏng o, vâ hnê dêi pó túa ki rơkê tơtro tung tơdroăng pêi cheăng mơjiâng pro luât, séa ngăn ƀă pơkâ mâu tơdroăng ki kal dêi tơnêi têa.

Pôa Vương Đình Huệ mơnhên tối, Kuô̆k hô̆i Việt Nam kô pêi tâi ivá tơná vâ péa Kuô̆k hô̆i péa tơnêi têa tơdâng ƀă tơrŭm cheăng ki phá tơ-ê pơla péa tơnêi têa, chiâng troăng tơdjâk ‘na tơrŭm Kuô̆k hô̆i râ má môi.

A Sa Ly tơplôu ƀă tơbleăng