VOV4.Xơ Đăng - Xua tơdroăng pơkuâ dêi pôa Vương Đình Huệ, Kăn xiâm hnê ngăn Kuô̆k hô̆i, kơxo lơ 7/9, Rôh hôp khu kăn Kuô̆k hô̆i ki pơkuâ hiăng pơxiâm po vâ tơpui tơno, ăm rơkong veăng tơpui tối tung 6 kơxop hlá mơéa, 1 kơxop hlá mơ-éa pơkâ pơtroh ăm Kuô̆k hô̆i tơbleăng tung Hneăng hôp má 4 la ngiâ.

Kăn xiâm hnê ngăn Kuô̆k hô̆i pơkuâ po Rôh hôp khu kăn Kuô̆k hô̆i ki pơkuâ

Tơpui a rôh po hneăng hôp, pôa Vương Đình Huệ, kăn xiâm hnê ngăn Kuô̆k hô̆i ăm ‘nâi, sap ing apoăng hneăng troh nôkố, Kuô̆k hô̆i hneăng 15 hiăng tơkŭm po ƀlêi chiâng 4 hneăng hôp, pơkâ 8 tơdroăng, ăm rơkong veăng tơpui tối tung 7 kơxop hlá mơ-éa luât ki ê, pơkâ 62 tơdroăng pơkâ ƀă tơdroăng ki môi tuăn khât.

Hneăng hôp má 4 la ngiâ ah dêi Kuô̆k hô̆i ai hên hnoăng cheăng ki kal. Mâu tơdroăng ki kal, kơxop hlá mơ-éa pơtroh ăm Kuô̆k hô̆i tơbleăng hiăng châ Vi ƀan pơkuâ Kuô̆k hô̆i, Chin phuh pơkâ thế tơkŭm po tơpui tơno, xo rơkong tơpui tối ing hên rôh, a hên hneăng hôp, rôh hôp tí tăng ‘nâi plĕng, Vi ƀan pơkuâ Kuô̆k hô̆i xuân hiăng ăm rơkong veăng tơpui tối nhên ‘na mâu tơdroăng ki kân ối ai rơkong tơpui tối phá tơ-ê dêi rơpó a Rôh hôp ‘na mơjiâng luât ki apoăng dêi Vi ƀan pơkuâ Kuô̆k hô̆i.

Katarina Nga tơplôu ƀă tơbleăng