VOV4.Xơ Đăng - Kơxê lơ 22/8, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i hiăng veăng ai mâ a rôh pêi cheăng pơla Khu kăn séa ngăn dêi Kuô̆k hô̆i ƀă Vi ƀan hnê ngăn pơlê kong kân Hà Nội ‘na tơdroăng ki pêi pro kơdĭng, hbrâ mơdât pro mơ’nhê. Tối tơbleăng dêi Vi ƀan hnê ngăn pơlê kong kân Hà  Nội tối nhên, hnoăng cheăng pêi pro kơdĭng hbrâ mơdât pro mơhrê liăn ngân đi đo cho tơmâng ngăn, pơkuâ, hnê mơhno kơtăng ƀă mơnhên cho hnoăng cheăng ki kal dêi Pơlê kong kân.

Ki rơhêng vâ tối tung hneăng hơnăm 2016 - 2021, Pơlê kong kân hiăng kơdĭng châ vâ chê 42 rơpâu rơtal liăn. Tơpui a rôh pêi cheăng, pôa Vương Đình Huệ mơnhên tối, Pơlê kong kân Hà Nội cho pơlê kong kân đi đo ai hiâm mơno pôu râng ó khât ‘na kơdĭng, hbrâ mơdât pro mơhrê liăn tung kơvâ cheăng tơdjuôm ƀă tơcheăng krê.

Tâ tá rôh pêi cheăng dêi kăn xiâm hnê ngăn Kuô̆k hô̆i ƀă Vi ƀan hnê ngăn pơlê kong kân Hà Nội

Tung la ngiâ ah, Pơlê kong kân Hà Nội kal séa ngăn vâ pôi tá pro mơhrê liăn ngân, tơnêi tơníu môi tiah ƀăng tơnêi pêi chiâk deăng tá hâi xúa, tơdroăng ki hdi xo, xúa ôh tá tro luât tơnêi pêi chiâk deăng; pro hdrối tâ pơkâ tơnêi tơníu, tơmiât vâ ai tơnêi tơníu ki rơlối ăm mơnhông, tung tơdroăng ki ai hên tơnêi deăng.

Katarina Nga tơplôu ƀă tơbleăng