Hâi lơ 21/10, pôa Vương Đình Huệ, Kăn xiâm hnê ngăn Kuô̆k hô̆I tơdah Kăn pơkuâ Viƀan tơpui kâ ƀă kong têa ê Kuô̆k hô̆I kong têa Lếo Sanya Praseuth (San-na Pờ-ra-sợt), Kăn pơkuâ Viƀan tơpui kâ ƀă kong têa ê, tơrŭm cheăng lâp plâi tơnêi, pơkuâ tơdroăng kal dêi Kuô̆k hô̆I kong têa  Kul Sous Yara, klăng roh veăng Hneăng hôp kơ-êng pơla pá Viƀan tơpui kâ ƀă kong têa ê Kuô̆k hô̆I pái kong têa Kul – Lếo – Việt Nam.

Kăn xiâm hnê ngăn Kuô̆k hô̆I tơdah Kăn pơkuâ Viƀan tơpui kâ ƀă kong têa ê Kuô̆k hô̆I Lếo, Kul

A roh tơdah, pôa Vũ Hải Hà, Kăn pơkuâ Viƀan tơpui kâ ƀă kong têa ê  tơbleăng tối ƀă pôa Vương Đình Huệ, Kăn xiâm hnê ngăn Kuô̆k hô̆I ‘na tơdroăng châ tơƀrê hneăng hôp kơ-êng pơla 3 Viƀan tơpui kâ kong têa ê dêi Kuô̆k hô̆I 3 kong têa. Pơtối mê, 3 Viƀan tơpui kâ ƀă kong têa ê hiăng rơtế dêi pó tơpui tơno, môi tuăn pơkâ Khu râ kăn pơkuâ Kuô̆k hô̆I 3 kong têa mơjiâng troăng trâm dêi pó rêm hneăng khu râ kăn xiâm pơla Kuô̆k hô̆I 3 kong têa. Pôa Vương Đình Huệ tối, mâu tơdroăng ki pái kong têa hiăng tơpui ƀă châ môi tuăn tung tơdroăng thăm tơrŭm dêi pái kong têa, ôh tá xê to kum ăm tơrŭm cheăng pơla péa pâ rêm tơnêi têa lĕm tro tâ mê ối thăm tơrŭm tâ mê nếo tơrŭm cheăng Kuô̆k hô̆I râ má môi; ki rơhêng vâ tối tung kơvâ mơnhông mơdêk cheăng kâ – rêh ối pơlê pơla.