VOV4.Xơ Đăng - Kơxê lơ 29/7, pôa Vương Đình Huệ, kăn xiâm hnê ngăn Kuô̆k hô̆i hiăng tơdah kăn teăng mâ ki tơviah Khu tơrŭm tơroâ pơla Nhuk – Việt Nam cho pôa Takebe Tsutomu. Pôa Vương Đình Huệ mơnhên tối khât hnoăng cheăng dêi kăn teăng mâ Khu tơrŭm tơroâ Việt Nam – Nhuk cho pôa Takebe Tsutomu tung tơdroăng ki mơdêk tơrŭm cheăng pơla péa tơnêi têa tối tơdjuôm ƀă pơla péa kơ koan mơjiâng luât péa tơnêi têa tối krê.

Tâ tá rôh tơdah

Pôa Vương Đình Huệ mơnhên tối khât ki pơxúa dêi Hngêi trung Đăi hok Việt – Nhuk ối tung Đăi hok Quốc gia Hà Nội; tối loi tơngah Hngêi trung Đăi hok Việt – Nhuk kô môi tiah on kơđĕng ki trâ bâ eăng, mơhno tối ăm tơdroăng ki tơrŭm cheăng pơla péa tơnêi têa. Kăn xiâm hnê ngăn tơnêi têa phiu ro tơdroăng Khu xiâm mơjiâng luât kong têa Nhuk hơ’lêh túa pơkâ hnê mâu sinh viên Việt Nam a Nhuk; rơhêng vâ péa tơnêi têa pơtối tơrŭm vâ mơdêk tơƀrê dêi tơdroăng tơrŭm cheăng kố; tơdrêng amê hlối hriăn ngăn mơdêk tơrŭm pêi cheăng tung la ngiâ.

Katarina Nga tơplôu ƀă tơbleăng