Kơxê măng lơ 19/6, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i hiăng tơdah Khu kăn Kuô̆k hô̆i pơkuâ ‘na tơrŭm cheăng ƀă mâu kong têa Đông Nam Á ƀă ASEAN dêi Kuô̆k hô̆i châu Âu (EP) pôu Việt Nam xua pôa Daniel Caspary, Kăn hnê ngăn khu xiâm pơkuâ khu kăn kố. Pôa Vương Đình Huệ, kăn xiâm hnê ngăn Kuô̆k hô̆i tối nhên, Việt Nam ngăn nhuô̆m ƀă rơhêng vâ thăm mơdêk tơrŭm cheăng ƀă Khu tơrŭm châu Âu (EU), tung mê, ai Kuô̆k hô̆i Châu Âu – kong têa tơrŭm cheăng ki kal xiâm tung inâi tơpui kâ dêi Việt Nam tung tâi tâng mâu kơvâ cheăng dêi Kuô̆k hô̆i, Chin phuh, trâm mâ kuăn pơlê.

A rôh tơdah, péa pâ pơkâ pơtroh mâu khu râ kăn xiâm, rêm râ pơkuâ cheăng troh a tơnêi dêi rơpó; péa pâ pơtối tơrŭm krá tơniăn, malối cho tung tơdroăng ki tơpui tơno ‘na ki rơkê plĕng tung tơdroăng cheăng dêi kuô̆k hô̆i, pêi klêi troăng hơlâ luât, tŏng kum mâu tơdroăng ki pơloăng mơnúa tung lâp plâi tơnêi.

Pakĭng tơdroăng ki thăm mơdêk tơrŭm cheăng pơla péa pâ, péa pâ kal kơhnâ tơrŭm krá tơniăn a mâu rôh hôp Kuô̆k hô̆i ƀă kơpong ki kal; tơngah, tơrŭm cheăng kô pơtối châ mơdêk tâ mê nếo, tung mê, tơrŭm cheăng Kuô̆k hô̆i kô cho tơdroăng ki kal tung tơrŭm cheăng tâi tâng pơla EU ƀă Việt Nam.