VOV4.Xơ Đăng - Tơdah Khu râ kăn Vi ƀan pơkuâ tê mơdró lâp plâi tơnêi dêi Kuô̆k hô̆i râ má môi châu Âu xua pôa Bernd Lange pơkuâ djâ troh lăm pôu ƀă pêi cheăng a Việt Nam, pôa Vương Đình Huệ, Kăn xiâm hnê ngăn Kuô̆k hô̆i tối nhên, Kuô̆k hô̆i ƀă mâu kơ koan cheăng dêi Việt Nam hbrâ tơrŭm ƀă Khu tơrŭm châu Âu vâ thăm mơnhông mâu khu tơrŭm ki ê dêi EU kĭ ƀă pêi pro Tơdroăng tơkêa bro tê mơdró tơ’lêi hlâu pơla Việt Nam EVFTA – EU.

Kăn xiâm hnê ngăn Kuô̆k hô̆i tơdah Khu kăn Vi ƀan pơkuâ tê mơdró lâp plâi tơnêi dêi Kuô̆k hô̆i râ má môi châu Âu

Pôa Vương Đình Huệ tối, roh lăm pôu dêi Vi ƀan pơkuâ tê mơdró lâp plâi tơnêi dêi Kuô̆k hô̆i râ má môi châu Âu tơkŭm po tung pơla Việt Nam ƀă EU ai tơrŭm păng ‘nâng tung mâu tơdroăng cheăng xiâm kal kí, tơpui kâ ƀă kong têa ê, gâk kring, cheăng lêng, cheăng kâ ƀă mâu kơvâ ki ê. Kăn xiâm hnê ngăn Kuô̆k hô̆i pơkâ thế, EU pơtối rak hnoăng tơniăn hơniâp lĕm, tơniăn, gak kring, tơniăn drô troăng têa kơxĭ ƀă troăng tơƀai a têa kơxĭ Biển Đông; pêi pro trâu hơngế tâ mâu tơdroăng tơrŭm dêi Việt Nam ƀă EU rơtế mâu kong têa tơrŭm a mâu hneăng hôp hên pâ; pơtối thăm tơrŭm pơla EU ƀă ASEAN, ki má lối cho thăm mơnhông hnoăng dêi ASEAN a Ấn Độ Dương ƀă Thái Bình Dương.

A Sa Ly tơplôu ƀă tơbleăng