VOV4.Xơ Đăng - Kơxê măng lơ 6/9, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng tơdah pôa Khuong Sreng, ngế cheăng tíu xiâm Đảng Nhân dân Kul (CPP), Kăn Pơlê kong xiâm Phnom Penh, pơkuâ djâ khu kăn xiâm pơlê kong xiâm Phnom Penh lăm pôu Việt Nam ƀă pêi cheăng a Pơlê kong xiâm Hà Nội. 

Kăn xiâm hnê ngăn Kuô̆k hô̆i tơdah Khu kăn xiâm Pơlê kong xiâm Phnom Penh, Kul

Pôa Vương Đình Huệ, kăn xiâm hnê ngăn Kuô̆k hŏi tối nhên, troăng tơmiât môi to dêi Đảng, Tơnêi têa Việt Nam ngăn nhuô̆m tơrŭm cheăng “Achê tơniăn lĕm, tơrŭm tơroâ khôi hmâ, tơrŭm tung tâi tâng, krá tơniăn ton xŏn” ƀă Kul tung tâi tâng mâu tơdroăng cheăng dêi Đảng, Chin phuh, Kuô̆k hô̆i.

Tung pơla hơnăm 2022 ai pơxúa kal khât cho Hơnăm tơrŭm tơroâ Việt Nam – Kul, tơbâ 55 hơnăm hâi mơjiâng tơrŭm cheăng tơpui kâ pơla péa tơnêi têa, kăn xiâm hnê ngăn Kuô̆k hô̆i pơkâ thế Pơlê kong xiâm tơdah tơpui tơno môi tuăn ƀă mơdêk mâu tơdroăng cheăng trâm mâ, mâu tơdroăng tơrŭm cheăng, tối ăm dêi rơpó mâu tơdroăng ki rơkê plĕng tung hên kơvâ cheăng môi tiah cheăng kâ tê mơdró, ‘no liăn cheăng, ôm hyô; rơhêng vâ, Kăn Pơlê kong xiâm Phnom Penh tơmâng ngăn, pro tơ’lêi hlâu ăm mâu khu mơdró kâ, kuăn pơlê Việt Nam dế rêh ối, pêi cheăng a kong têa Kul.

Katarina Nga tơplôu ƀă tơbleăng