VOV4.Xơ Đăng - Kơxê măng lơ 23/8 a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng tơdah Khu râ kăn teăng mâ Khu pơkuâ Droh rơtăm, Đảng Dân chủ Tự do Nhuk lăm pôu pêi cheăng a Việt Nam. Pôa Vương Đình Huệ rơkâu Đảng Dân chủ Tự do Nhuk châ ƀlêi trâng kân tung roh tâ phĭu Kuô̆k hô̆i râ má môi khế 7 pơla kố nah. Kheăn kơdeăn hnoăng dêi droh rơtăm, mâu kăn Kuô̆k hô̆i râ má môi tung mơnhông mơdêk tơrŭm cheăng Việt Nam – Nhuk, Kăn xiâm hnê ngăn Kuô̆k hô̆i mơnhên. Kuô̆k hô̆i Việt Nam môi tuăn thăm tơrŭm cheăng pơla rơxông ối nếo péa tơnêi têa ƀă mâu kăn Kuô̆k hô̆i râ má môi hơnăm ối nếo péa tơnêi têa.

Kăn xiâm hnê ngăn Kuô̆k hô̆i pơkâ thế mâu kăn Kuô̆k hô̆i râ má môi hơnăm ối nếo Khu pơkuâ Droh rơtăm Đảng LDP Nhuk pơtối tơmâng troh mâu ngế Việt Nam a Nhuk, tơmâng hên tâ mê nếo troh mâu troăng pơkâ pêi, troăng hơlâ tơrŭm cheăng 'na pêi cheăng pơla péa tơnêi têa, pro tơ’lêi hlâu vâ mơngế pêi cheăng Việt Nam troh pêi cheăng a Nhuk. Rơtế amê, droh rơtăm péa tơnêi têa kô tơkŭm po mâu Festival droh rơtăm, sinh viên rêm hneăng, ki má lối cho tung hơnăm 2023 drêng péa tơnêi têa leh tơbâ 50 hơnăm mơjiâng tơrŭm cheăng tơpui kâ; kăn Kuô̆k hô̆i râ má môi hơnăm ối nếo péa tơnêi têa kal thăm tơkŭm po mâu roh lăm pôu, hnê dêi pó túa ki rơkê tơtro tơdroăng pêi cheăng, tối ăm dêi pó ‘na mâu tơdroăng ki péa pâ rơhêng vâ ‘nâi plĕng.

A Sa Ly tơplôu ƀă tơbleăng