Tung roh lăm pôu pêi cheăng Kŏng hoa Cuba, kơxo lơ 20/4, tiô chô Việt Nam, pôa Vương Đình Huệ, Kăn xiâm hnê ngăn Kuô̆k hô̆i hiăng ai ƀai xông tơpui ki kal a roh hôp tâi tâng ki phá tơ-ê dêi Kuô̆k hô̆i Cuba hneăng má X. Pôa Vương Đình Huệ, Kăn xiâm hnê ngăn Kuô̆k hô̆i mơnê Đảng, Tơnêi têa Cuba hiăng hâk tơngăm cho nhŏng o kong têa ê apoăng châ xông tơpui a ngiâ Kuô̆k hô̆i Khu râ kăn xiâm pơkuâ kuăn pơlê Cuba, klêi kơ’nâi Kuô̆k hô̆i hneăng má X nếo rah xo Khu râ kăn xiâm nếo dêi Tơnêi têa Cuba hneăng hơnăm 2023 – 2028.

Kăn xiâm hnê ngăn Kuô̆k hô̆i tối nhên, troh nôkố tơkâ hluâ hên pá puât, mơdât kơtăng, kong prâi pro ôh tá tơniăn, pơreăng tâ, Cuba dế châ tơƀrê hên tung pêi pro “pơ’lêh tơ’nôm troăng pêi cheăng kâ”. Tung pơla tơxup tơbriât lâp plâi tơnêi dế ai cho ôh tá tơniăn, tơdroăng ki mê pơkâ péa tơnêi têa thế rŭm môi tuăn, tơrŭm krá gak, rak pơkâ tơniăn krê, pơkuâ xêh, tơrŭm tơdâng tơ’mô. Tiô hiâm mơno tơpui tơno, hriâm tâp a dêi pó, pôa Vương Đình Huệ hiăng tối 6 tơdroăng xiâm ‘na pơ’lêh nếo, mơdêk tâ mê ki dâi lĕm, châ tơƀrê tơdroăng pêi cheăng dêi Kuô̆k hô̆i Việt Nam tung hneăng nếo. Mơgêi roh hôp tâi tâng ki má môi cho ƀai hơdruê ‘’Như có Bác Hồ trong ngày vui đại thắng’’ xua mâu hok tro Cuba mơđah tơbleăng.