Pơtối roh lăm pôu pêi cheăng a kong têa New Zealand, kơxo lơ 5/12, a pơlê kong kân Hamilton, pôa Vương Đình Huệ, Kăn xiâm hnê ngăn Kuô̆k hô̆i veăng Hneăng hôp tơpui tơno tơrŭm hnê hriâm Việt Nam – New Zealand. Xông tơpui a hneăng tơpui tơno, pôa Vương Đình Huệ vêh tối tơdroăng ki kal tung roh lăm pôu pêi cheăng pơla kố nah dêi New Zealand troh a Việt Nam, péa tơnêi têa hiăng kĭ môi tuăn tơrŭm cheăng pơla Khu xiâm pơkuâ hnê hriâm Việt Nam – New Zealand, tiô Kăn xiâm hnê ngăn Kuô̆k hô̆i, kố cho xiâm kối luât ki kal vâ péa tơnêi têa thăm tơdjêp, tơrŭm hnê hriâm ôh tá xê to pơla Chin phuh ƀă Chin phuh, pơla khu xiâm ƀă khu xiâm mê ối tơdjêp pơla mâu tíu hnê hriâm ƀă hnê mơjiâng ƀă dêi rơpó.

Tối nhên, tơdroăng tơrŭm tung kơvâ hnê hriâm ƀă New Zealand kô hlối hnê nâl kong têa Ăng-glê, Kăn xiâm hnê ngăn Kuô̆k hô̆i tối ăm ‘nâi, kố cho môi tơdroăng ki tơ’lêi hlâu ôh tá xê to kong têa ki lâi xuân ai; tơdrêng amê pói vâ hneăng hôp tơpui tơno kô po môi hneăng nếo ăm tơrŭm hnê hriâm ƀă hnê mơjiâng pơla péa tơnêi têa Việt Nam – New Zealand.