VOV4.Xơ Đăng - Kơxê lơ 26/8, a Hngêi Kuô̆k hô̆i, Hô̆i đong khoa hok dêi Vi ƀan pơkuâ Kuô̆k hô̆i tơrŭm ƀă Vi ƀan Cheăng kâ dêi Kuô̆k hô̆i, Khu xiâm ngăn kế tơmeăm khoăng tung têa, a tơnêi ƀă Hyôh kong prâi, Viê̆n Hriăn ngăn mơjiâng luât ƀă Khu ngăn tơdroăng Luât Việt Nam rơtế tơkŭm po rôh hôp “Ăm rơkong veăng tơpui tối ‘na kơxop hlá mơéa Luât Tơnêi tơníu ki ‘mâi pơ’lêh tiô Pơkâ dêi Khu pơkuâ ngăn Tíu xiâm Đảng hneăng 13”. Rôh hôp xua pôa Vương Đình Huệ, kăn xiâm hnê ngăn Kuô̆k hô̆i ƀă mâu kăn xiâm phŏ hnê ngăn Kuô̆k hô̆i pơkuâ po.

Tâ tá hneăng hôp

Rôh hôp kố châ po vâ mơhnhôk mơdêk hnoăng cheăng, tuăn ngoâ rơkê dêi mâu khu ki rơkê plĕng, khu hriăn ‘na khoa hok, khu ki rak ngăn, mâu ngế ki ai tuăn ngoâ rơkê tung tơdroăng ki ai khât tung hên kơvâ cheăng veăng tung tơdroăng ki ăm rơkong veăng tơpui tối, vâ pêi pro klêi hlá mơéa Luât Tơnêi tơníu ki ‘mâi pơhlêh. Klêi kơ’nâi Rôh hôp kô châ kơ koan pơkuâ dêi Hô̆i đong khoa hok dêi Vi ƀan pơkuâ Kuô̆k hô̆i tơkŭm tơbleăng ăm mâu kơ koan ki ai hnoăng pơkuâ vâ hriăn ngăn, veăng tơpui tơno, kum tơdroăng kố ăm Kuô̆k hô̆i séa ngăn, tơpui tơno tơdroăng tơkêa Luât Tơnêi tơníu ki ‘mâi pơ’lêh tung la ngiâ.

Katarina Nga tơplôu ƀă tơbleăng