A tíu pêi cheăng dêi Khu xiâm tơpui kâ, Ngế xiâm ngăn tê mơdró ƀă ngăn tơdroăng loi tĭng tiô khôp Argentina a pơlê kong xiâm Buenos Aires, tung roh lăm pôu kong têa Argentina, pôa Vương Đình Huệ - Kăn xiâm hnê ngăn Kuô̆k hô̆i hiăng veăng Hôp khu mơdró Việt Nam - Argentina.

Xông tơpui a hneăng hôp, jâ Cecilia Todesca Bocco, Kăn xiâm pơkuâ ‘na mâu tơdroăng cheăng kâ, lâp plâi tơnêi dêi Ngế xiâm tơpui kâ ‘na tê mơdró ƀă ngăn tơdroăng loi tĭng, tiô khôp Argentina ăm ‘nâi, tơmeăm tê mêdró ƀă tơdroăng veăng kum dêi cheăng kâ péa tơnêi têa hiăng veăng ‘no hnoăng tung mơdêk tơrŭm cheăng kâ, tê mơdró pơla péa tơnêi têa tung mâu hơnăm hdrối.

Tơdroăng Việt Nam cho tơnêi têa tơrŭm tê mơdró má tơdrốu dêi Argentina  ƀă kơxô̆ tơmeăm tê ăm kong têa ê châ 3,3 rơtal dollars ƀă rôe tơmeăm ing  Việt Nam 1,24 rơtal dollars. Jâ Cecilia Todesca Bocco tối ăm ‘nâi, hneăng hôp xuân vâ tối nhên tơdroăng hôp tơpui ƀă mâu tơdroăng tơkêa bro kô châ tơrŭm tơdjuôm; hlối tối nhên, hneăng hôp xuân cho tíu vâ péa pâ rơtế pêi  mâu tơdroăng tơrŭm cheăng 50 hơnăm la ngiâ.