Kơxo lơ 3/7, pôa Vương Đình Huệ, Kăn xiâm hnê ngăn Kuô̆k hô̆i veăng ƀă xông tơpui a roh pơxiâm po roh hôp má 12 Hô̆i đong kuăn pơlê dêi Pơlê kong kân Hà Nội. Pôa Vương Đình Huệ, Kăn xiâm hnê ngăn Kuô̆k hô̆i kheăn kơdeăn tơdroăng châ tơƀrê pêi cheăng dêi Hô̆i đong kuăn pơlê dêi Pơlê kong kân Hà Nội, tung mê, Hô̆i đong kuăn pơlê dêi pơlê kong kân ƀă mâu râ veăng hên, ai pôu râng hnoăng cheăng châ tơƀrê lĕm dêi roh tâ phĭu rah xo Kuô̆k hô̆i hneăng má XV ƀă kăn teăng mâ Hô̆i đong kuăn pơlê mâu râ hneăng hơnăm 2021 – 2026.

Ki má môi dêi hneăng cheăng kố cho Đảng đoân Hô̆i đong kuăn pơlê, Hnê mơhno má môi Hô̆i đong kuăn pơlê dêi pơlê kong kân hiăng pơkâ Khu pơkuâ tơdroăng cheăng Đảng pơlê kong kân Hà Nội tơbleăng ăm pêi pro ƀă po rơdâ pêi pro Tơdroăng tơkêa bro kơxô̆ 15 ‘na ‘’Mơdêk ivá, ki xêt khât, châ tơƀrê tơdroăng pêi cheăng dêi Hô̆i đong kuăn pơlê mâu râ hneăng hơnăm 2021 – 2026 ƀă pêi pro mơnúa troăng pêi khu râ kăn pơkuâ tíu kơdrâm kuăn pơlê rêh ối ƀă thăm tơniăn khu râ kăn pơkuâ a thôn pơlê a pơlê kong kân Hà Nội’’.

Hô̆i đong kuăn pơlê dêi pơlê kong kân hiăng thăm tơrŭm ƀă mâu Vi ƀan Kuô̆k hô̆i, Khu râ kăn teăng mâ Kuô̆k hô̆i pơlê kong kân vâ pêi pro châ tơƀrê mâu tơdroăng séa ngăn dêi Kuô̆k hô̆i ƀă Vi ƀan pơkuâ Kuô̆k hô̆i.