VOV4.Xơ Đăng - Hbrâ ăm tơdroăng pêi cheăng séa ngăn tơdroăng pêi ‘na pêi pro troăng hơlâ luât ‘na pêi pro kơdĭng, hbrâ mơdât mơ’nhê tê kơtê hneăng hơnăm 2016 – 2021, kơxo lơ 23/8, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i veăng roh pêi cheăng dêi khu râ kăn séa ngăn Kuô̆k hô̆i ƀă Khu xiâm pơkuâ liăn ngân.

Xông tơpui a roh pêi cheăng, Kăn xiâm hnê ngăn Kuô̆k hô̆i pơkâ Khu xiâm pơkuâ liăn ngân kal thế hlê plĕng tro kơdĭng ‘na liăn ngân ôh tá xê pôe kơdroh mơ’no hrê liăn mê tro môi tiah tơdroăng pơkâ pêi dêi luât kơdĭng, hbrâ mơdât mơ’nhê tơmeăm tê kơtê.

Tiô tơbleăng dêi pôa Hồ Đức Phớc, Ngế xiâm pơkuâ liăn ngân, sap hơnăm 2016 troh hơnăm 2021, mâu tíu cheăng dêi Khu xiâm pơkuâ liăn ngân hiăng kơdĭng châ lối 6 rơpâu rơtal liăn tung tơdroăng pro, mơnhên, kĭ ăm pêi pro kơxô̆ liăn xo hnoăng mơhá mơ’no cheăng, pơkuâ, xúa kơxô̆ liăn ngân tơnêi têa.

Riân troh hơnăm 2021 Khu xiâm rak liăn ngân hiăng kơdroh ƀiên chê̆ châ 106% pơkâ pêi, kơdroh 36 tíu cheăng u ối 28 tíu cheăng. Pôa Vương Đình Huệ tối nhên, pêi pro kơdĭng, hbrâ mơdât mơ’nhê liăn ngân tê kơtê ôh tá xê rêm hơnăm kơdĭng châ to lâi liăn ngân, mê ki kal cho séa ngăn, tah lôi mâu tơdroăng tơvâ tơvân, pá puât, mơjiâng troăng hơlâ mơnhông mơdêk vâ mơjiâng ki kơnâ thăm tơtêk.

A Sa Ly tơplôu ƀă tơbleăng