Tung hneăng lăm pôu, veăng ngăn tơdroăng ki pôk pro pơtáu dêi pôa Charles 3, kơxo hâi lơ 5/5, tiô chôu kong têa kố, a pơlê kong xiâm London, pôa Võ Văn Thưởng, Kăn xiâm hnê ngăn tơnêi têa pin hiăng lăm pôu ngăn hngêi ‘măn chôu kế tơmeăm dêi kong têa Ănglê-cho tíu ki ai pôa Karl Marx, Friedrich Engels, Lenin ƀă hên mâu ngế ki ai tuăn ngôa ki rơkê plĕng kơnía kân hiăng troh a kố vâ tí tăng hriăn plĕng tơdroăng ki mơjiâng ƀă chêh bro klêi ‘na tơpui leăng dêi chuh ngiah kŏng san khoa hok.

Akố, pôa Võ Văn Thưởng hiăng lăm pôu ngăn kơbong pơchuât hlá mơ-eá dêi Hngêi ‘măn rak kế tơmeăm, lăm pôu ngăn mâu tơmeăm khoăng ki ai tơdjâk troh kế tơmeăm xúa dêi pôa Karl Marx tung pơla pôa dế rêh ối nah, pêi cheăng ƀă hriăn plĕng ‘na chuh ngiah kŏng san khoa hok a kong têa Ănglê.

Tiô hlá mơ-eá chêh tối dêi Hngêi ‘măn rak kế tơmeăm, tung to lâi chât hơnăm hdrối mê hía nah, pôa Karl Marx hiăng pơtối mơnhông tuăn ngôa dêi tơná hnối tơrŭm ƀă tơdroăng ki hriăn plĕng dêi pôa Friedrich Engels, cho ngế ki hriăn plĕng ‘na triê̆t hok dêi kong têa Alơmăng ƀă chêh in mơ’no mâu kơxop hlá mơ-eá, mâu ƀai chêh dêi pôa, hriăn plĕng a kơbong pơchuât hlá mơ-eá Ănglê.

Pôa hiăng rơtế ƀă pôa Friedrich Engels đi đo hriăn mơjiâng troăng hơlâ kŏng san khoa hok, troăng hơlâ mê hiăng mot tung tuăn mơno dêi kuăn mơngế tung lâp tơnêi têa, cho ki xiâm dêi ngế ki mơjiâng chuh ngiah kŏng san khoa hok ƀă ai tơdjâk kân ó trâu rơdâ troh kuăn pơlê tung lâp tơnêi têa.