VOV.Xơ Đăng - Kơxo lơ 12/9, a tíu pêi cheăng pôa Nguyễn Xuân Phúc, Kăn xiâm hnê ngăn tơnêi têa hiăng diâp Pơkâ to kalŏng ing Trung tươ̆ng to Thươ̆ng tươ̆ng ăm pôa Phùng Sĩ Tấn, Kăn xiâm Phŏ tơbleăng cheăng lêng kuăn pơlê Việt Nam. Kăn xiâm hnê ngăn tơnêi têa loi tơngah ƀă pói vâ Thươ̆ng tươ̆ng Phùng Sĩ Tấn pơtối rak krá tơniăn ƀă mơdêk khên tơnôu kal kí krá tơniăn, tá hiâm mơno môi tuăn ƀă pơkâ pêi troh, troăng tơmiât pêi hnoăng cheăng kăch măng dêi Đảng; mơdêk hlê plĕng, hnoăng tung pơtâp, hriâm hiâm mơno tơdjâ kăch măng dêi kăn ƀô̆, đảng viên, dêi kăn ƀô̆ kăn tươ̆ng, tơxâng inâi ‘’Mô đô̆i Pôa Hồ’’.

Kăn xiâm hnê ngăn tơnêi têa diâp pơkâ to kơlŏng Thươ̆ng tươ̆ng ăm Kăn xiâm phŏ tơbleăng cheăng lêng khu lêng kuăn pơlê Việt Nam

Kăn xiâm hnê ngăn tơnêi têa pơkâ thế Thươ̆ng tươ̆ng Phùng Sĩ Tấn đi đo ‘nâi tơdroăng, rơtế ƀă khu pú hên Kăn xiâm pơkuâ Khu xiâm tơbleăng cheăng lêng mơjiâng Khu xiâm tơbleăng cheăng lêng krá tơniăn, tơdâng hnoăng cheăng tung chal nếo, mơnhông mơdêk khôi túa kăch măng ƀlêi trâng ‘’môi tuăn, rơkê tăng troăng tơmiât pêi, mơ-eăm tâi ivá tơná tung tơdroăng cheăng, tơmiât pêi rơkê, tơrŭm môi tuăn, rơtế dêi pó pêi, khŏm tơplâ, khŏm ƀlêi trâng’’.

A Sa Ly tơplôu ƀă tơbleăng