Kơxo lơ 29/6, pôa Võ Văn Thưởng, Kăn xiâm hnê ngăn tơnêi têa veăng ai mâ ƀă tơpui hnê mơhno a Leh ăm lăm pêi cheăng Hngêi pơkeăng bro pơtân râ má 2 kơxô̆ 5 ƀă Đô̆i công ƀinh kơxô̆ 2 lăm pêi dêi hnoăng cheăng rak vế tơdroăng ki hơniâp lĕm Khu lâp kong têa a peăng Hdroh Sudang ƀă Abyei. ‘Na Hngêi pơkeăng bro pơtân râ má 2 kơxô̆ 5 (teăng ăm Hngêi pơkeăng pơtân râ má 2 kơxô̆ 11 vâi kơdrâi, châ rah xo sap ing mâu Kuân khu 5, 7, 9; Kuân đoân 4; Hngêi pơkeăng Kuân khu 175; Khu xiâm rak vế hơniâp lĕm Việt Nam ƀă mâu tíu pêi cheăng ki ê.

 Khu lêng ki veăng mê châ hriâm nhên ‘na mâu tơdroăng, tá tơdroăng kal kí, lêng, mâu tơdroăng tŏng kum kih thuât, ‘na khăm pơlât, tơdroăng ki rak vế hơniâp lĕm tơtro ƀă tơdroăng ki ôh tá tơniăn tung tơdroăng ki ai khât, pêi pro châ tiô tơdroăng ki rơhêng vâ ai tŭm mâu tơdroăng pơkâ dêi Khu lâp kong têa ƀă pơkâ thế pêi pro hnoăng cheăng a dêi khu. Diâp pơkâ, diâp hlá cơ Tơnêi têa ăm khu lêng rak vế hơniâp lĕm a Leh lo lăm pêi cheăng, Kăn xiâm hnê ngăn tơnêi têa tối nhên, Đảng, Tơnêi têa đi đo tơngah, hâk tơngăm ‘na mâu tơdroăng ki châ tơƀrê dêi mâu lêng rak vế hơniâp lĕm dêi Việt Nam tung pơla hdrối nah, tơdrêng amê hlối tơngah a mâu tíu pêi cheăng châ tơbleăng troh tíu ki kal troh vâ mơdêk hiâm mơno khên tơnôu, tuăn ngoâ rơkê, ivá cheăng, pêi pro châ tiô tơdroăng ki rơhêng vâ dêi Khu lâp kong têa, tơxâng ƀă khôi hmâ Mố đô̆i Pôa Hồ tung pêi pro hnoăng cheăng rak vế hơniâp lĕm Khu lâp kong têa.