Kơxê lơ 18/5, Khu tơmâng tong II – Khi xiâm pơkuâ ngăn lêng tơkŭm po Leh tơdah xo Mê dái Chiến công ối má Môi dêi Đảng, Tơnêi têa diâp ăm. Pôa Võ Văn Thưởng, Kăn xiâm hnê ngăn tơnêi têa hiăng troh veăng ai mâ ƀă diâp mâu kế tơmeăm ki kơnía git dêi Đảng, Tơnêi têa diâp ăm mâu khu pú hên ƀă ngế krê a rôh leh. Tơpui a rôh Leh, pôa Võ Văn Thưởng rơkâu ƀă khĕn kơdeăn khu lêng tong tơmâng dêi Khu pơkuâ ngăn lêng tung plâ vâ chê 78 hơnăm mơjiâng, tơplâ ƀă ƀlêi chiâng, veăng kum hnoăng kân kĭn tung tơdroăng cheăng tơleăng lĕm hdroâng mơngế, pro tơnêi têa tơrŭm chiâng môi hdrối nah, xuân môi tiah tơdroăng ki mơjiâng ƀă rak vế Tơnêi têa nôkố.

Tung la ngiâ ah, kăn xiâm hnê ngăn tơnêi têa pơkâ thế Khu tơmâng tong dêi Khu xiâm pơkuâ ngăn lêng tung mâu tơdroăng ki lâi, xuân athế đi đo mơ-eăm pêi pro dêi tơdroăng ki Đảng pơkuâ, hnê mơhno mâu tơdroăng cheăng. Khu tong tơmâng dêi Khu pơkuâ ngăn lêng kal pơtối pêi pro tro hnoăng cheăng cho kơ koan tong tơmâng tơdroăng cheăng tung la ngiâ dêi Đảng, Tơnêi têa ƀă mâu kơ koan tong tơmâng ‘na kơvâ cheăng dêi Khu pơkuâ ngăn Đảng lêng Tơnêi têa, Khu xiâm pơkuâ ngăn lêng; pêi cheăng xiâm, tơƀrê ăm kăn pơkuâ Đảng, Tơnêi têa,

Khu pơkuâ ngăn Đảng lêng Tơnêi têa, Khu xiâm pơkuâ ngăn lêng tung mơnhên tối, tơmâng xo tơdroăng cheăng, mơnhên troăng hơlâ pơkâ tung la ngiâ ƀă pơkâ tơleăng mâu tơdroăng, pôi tá ăm tro kơdrâ ƀă hên ki ê đi đo tơxâng cho “tuăn, mâ” dêi Đảng, Tơnêi têa, Khu lêng.