Kơxê lơ 26/12, a tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa trâm mâ, khĕn kơdeăn 33 ngế hok tro ki châ kâ pri Olympic ƀă kâ pri Khoa hok kih thuât lâp plâi tơnêi hơnăm 2022.  Hơnăm kố, Khu xiâm ngăn hnê hriâm ƀă hnê mơjiâng  tuăn ngôa rơkê  rah 7 khu hok tro rơkê Việt Nam ƀă 38 hdrôh ngế hok tro veăng lăm tơ’noăng Olympic lâp plâi tơnêi. Klêi tơ’noăng, 100% ngế hok tro Việt Nam ki lăm tơ’noăng xuân châ kâ pri. Mâu khu Việt Nam pơtối châ ối tung top 10 to kong têa ki ai điêm hên má môi ƀă hên hok tro châ điêm hên.

Nhoăm diâp 10 Mê dai Pêi cheăng ối má Péa, 7 Mê dai Pêi cheăng ối má Pái ăm mâu vâi o hok tro ki ai hnoăng tơ’noăng rơkê rôh tơ’noăng Olympic ƀă ăm Pri khoa hok kih thuât lâp plâi tơnêi hơnăm 2022, tơbleăng a rôh trâm mâ, pôa Nguyễn Xuân Phúc mơhno hiâm mơno sôk ro drêng trâm mâ mâu vâi o hok tro  ki hiăng djâ vêh ăm tơnêi têa tơdroăng ki hơniâp ro.

Pôa Nguyễn Xuân Phúc, Kăn xiâm hnê ngăn tơnêi têa tối nhên, tơdroăng hmâ pêi pro ki lĕm sap nah dêi hdroâng mơngế pin đi đo tơmâng khât troh  tơdroăng tơmâng păn roăng ƀă hnê mơhno mơngế rơkê. Đảng Tơnêi têa pin đi đo tối, Hnê hriâm cho troăng rơhlâ má môi, ƀă vâ ai  hên mơngế ki rơkê kum ăm ‘no pêi cheăng mơnhông tơdroăng hnê hriâm.