Pôa Võ Văn Thưởng - Kăn xiâm hnê ngăn tơnêi têa nếo klêi hneăng lăm pôu pêi cheăng veăng leh ngăn pôk pro pơtáu kong têa Ănglê Charles Má Pái sap hâi lơ 4 troh hâi lơ 5/6 /2023. Pôa Võ Văn Thưởng - Kăn xiâm hnê ngăn tơnêi têa hiăng pêi hên tơdroăng cheăng ki kal: veăng ngăn leh pôk pơtáu; trâm mâ hlối rơkâu pơtáu Charles Má Pái; trâm mâ pôa Rishi Sunak, Ngế pro xiâm hnê ngăn kong têa; pơtối tơdah kăn xiâm hnê ngăn Kuô̆k hô̆i râ má péa jâ Lindsay Hoyle,  Kăn xiâm phŏ hnê ngăn Kuô̆k hô̆i râ má péa - pôa Nigel Evans, Ngế xiâm tơpui kâ pôa James Cleverl, Ngế xiâm pơkuâ ngăn lêng pôa Ben Wallace ƀă hên mâu kăn  ki ê pêi cheăng tung Chin phuh Ănglê.

Tung mâu rôh trâm mâ, pôa Võ Văn Thưởng ƀă pơtáu Charles Má pái, Kăn xiâm hnê ngăn Chin phuh, Kuô̆k hô̆i Ănglê xuân tối tiah kố tơmeăm ai hlâu tơrŭm cheăng pơla péa tơnêi têa Ănglê - Việt Nam cho kân ‘nâng. Péa pâ xuân tối mơ-eăm tung mơdêk tơrŭm cheăng kân tâ nếo; môi tuăn vâ pơtối mơdêk tơpui tơno tơrá mâu kăn xiâm tung mâu Đảng, Tơnêi têa, Chin phuh, Kuô̆k hô̆i  râ má péa hlối trâm mâ tơpui ƀă kuăn pơlê.

Péa pâ xuân vâ môi tuăn tơrŭm krá ƀă kô veăng kum dêi rơpó tung hên  tơdroăng, mê cho Ănglê - ASEAN, Khu lâp kong têa, Hô̆i đong ngăn Hnoăng rêh ối dêi mơngế hneăng 2023-2025 ƀă kĭ tơrŭm cheăng tung tŭm tơdroăng ƀă ki rơkê plĕng tơkâ luâ Thái Bình Dương.