VOV4.Xơ Đăng - Tung rôh pêi cheăng a Quảng Nam, pôa Nguyễn Xuân Phúc, Kăn xiâm hnê ngăn tơnêi têa veăng hôp ƀă tơpui a rôh hôp Mơdêk ăm sâm Ngọc Linh chiâng inâi tơnêi têa. Tơpui a rôh hôp, pôa Nguyễn Xuân Phúc, Kăn xiâm hnê ngăn tơnêi têa môi hdroh nếo tối nhên tơdroăng ki loi tơngah mơni kô ăm “Pơkeăng lâp tơnêi têa” sâm Ngọc Linh chiâng “tơdroăng ki kal xiâm ăm tơdroăng rêh kâ ối kuăn pơlê”, cho tơdroăng ki loi tơngah nếo dêi Việt Nam tung kơvâ pơkeăng ƀă kế tơmeăm ki pro mơdêk ivá.

Ƀă ki ai hlâu tung pêt, kơchơ tê mơdró ƀă ki kơnía dêi Sâm Ngọc Linh, Kăn xiâm hnê ngăn tơnêi têa ai tối tiah kố, Việt Nam ai tíu vâ mơjiâng môi kơvâ cheăng ƀă kơmăi kơmok pêt ƀă uâ pơliê Sâm Ngọc Linh dêi Việt Nam ƀă tơdroăng ki rơhêng vâ rơtal dollars ki kơnía tung pêt ƀă tê ngi kong têa ê tung mâu chât hơnăm la ngiâ. Vâ pêi pro châ tơdroăng ki rơhêng vâ kố, Kăn xiâm hnê ngăn tơnêi têa tối tiah kố, kal ai tơdroăng ki tŏng kum dêi Chin phuh, mâu khu xiâm kơvâ cheăng ƀă kong pơlê ƀă khu mơdró kâ. Kăn xiâm hnê ngăn tơnêi têa tối nhên kal mơnhông inâi sâm Ngọc Linh cho inâi tơnêi têa ôh ti xê to inâi dêi môi kế tơmeăm lơ dêi khu mơdró kâ.

Katarina Nga tơplôu ƀă tơbleăng