Roh lăm pôu pêi cheăng tơkŭm po tung pơla tơrŭm cheăng nhŏng o, tơrŭm môi tuăn ki má môi ƀă tơrŭm tâi tâng pơla Việt Nam ƀă Lếo pơtối mơnhông lĕm tro; péa pâ mơnhên tơdroăng khŏm mơ-eăm, mơdêk tơrŭm cheăng nhŏng o, tơrŭm môi tuăn ƀă tơrŭm tâi tâng Việt Nam – Lếo tung rơxông nếo, tơtro ƀă tơdroăng nôkố dêi rêm kong têa.

Tung roh lăm pôu pêi cheăng, pôa Lương Cường, Kăn xiâm hnê ngăn tơnêi têa hiăng ai roh tơpui tơno ki kal ƀă pôa Thongloun Sisoulith, Kăn xiâm pơkuâ hnê ngăn Đảng, Kăn xiâm hnê ngăn kong têa Lếo; trâm pôa Saysomphone Phomvihane, Kăn xiâm hnê ngăn Kuô̆k hô̆i ƀă pôa Sonexay Siphandone, Ngế pro xiâm hnê ngăn tơnêi têa Lếo.

A mâu roh hôp tơpui tơno, trâm mâ, péa pâ hiăng tơpui tơno ƀă môi tuăn ‘na mâu ‘na mâu troăng prôk kân mơnhông mơdêk tơrŭm cheăng pơla péa pâ tơnêi têa tung la ngiâ, tung mê môi tuăn rak krá tơniăn tơrŭm kal kí loi tơngah, tơrŭm, rak mâu roh lăm pôu pêi cheăng, trâm mâ khu râ kăn xiâm ƀă mâu râ đi đo, tơtrŏng mơdêk trâm mâ tơrŭm pơla kuăn pơlê péa tơnêi têa ing hên troăng pêi, ƀeăn ƀĕng.