VOV4.Xơ Đăng - Kơxê lơ 21/7, a Tíu pêi cheăng Kăn xiâm, pôa Nguyễn Xuân Phúc, Kăn xiâm hnê ngăn tơnêi têa, Kăn cheăng tung Khu xiâm kal kí, Kăn xiâm pơkuâ Khu hnê mơhno mơjiâng tơdroăng tơkêa bro “Troăng pêi cheăng ton xŏn mơjiâng ƀă pêi kêi đeăng Tơnêi têa tiô luât xah hô̆i chuh ngiah Việt Nam troh hơnăm 2030, mơnhên troăng prôk troh hơnăm 2045’’ pơkuâ roh pêi cheăng ƀă Khu xiâm pơkuâ tơdroăng tơnêi têa ƀă Khu hnê mơhno má môi Tôh rah chêh, mâu ngế rơkê, ngế cheăng khoa hok ‘na pêi kêi đeăng Tơdroăng tơkêa bro.

Kăn xiâm hnê ngăn tơnêi têa pêi cheăng ƀă Khu xiâm pơkuâ tơdroăng tơnêi têa ‘na mơjiâng Tơnêi têa tiô luât xah hô̆i chuh ngiah

Xông tơpui hnê mơhno a roh pêi cheăng, pôa Nguyễn Xuân Phúc kheăn kơdeăn Khu xiâm pơkuâ tơdroăng tơnêi têa, mâu ngế cheăng khoa hok, mơngế rơkê ‘na luât hiăng tơpui tơno tá hiâm mơno, pôu râng hnoăng cheăng, tơdrăng ‘na mâu tơdroăng dêi Tơdroăng tơkêa bro; tơdrêng amê mơnhên tơdroăng mơ-eăm, hiâm mơno pôu râng hnoăng cheăng dêi Tôh rah chêh mơjiâng tơdroăng tơkêa bro.

‘Na mâu tơdroăng nếo châ tối tung tơdroăng tơkêa bro, Kăn xiâm hnê ngăn tơnêi têa tối rơdêi kal tối inhên ăm hlo ki tro ‘ló vâ tơmâng, tối krá tơniăn, inhên. Mâu mơ-éa tơniăn tơdâng tơ’mô, krá tơniăn tá ‘na luât ƀă kal kí. Kăn xiâm hnê ngăn tơnêi têa pơkâ thế Tôh rah chêh mơjiâng Tơdroăng tơkêa bro tơmâng mâu rơkong tơpui tối a roh pêi cheăng, thâ séa ngăn, tơ’nôm kêi đeăng tơdroăng tơkêa bro vâ pơtối pâ rơkong tơpui a Roh hôp má pŭn dêi Khu hnê mơhno.

A Sa Ly tơplou ƀă tơbleăng