Vâ rơnêu rĕng má môi tơmeăm khoăng xua kong mêi khía mơhot roh má 5 ƀă kong mêi têa kân lân lu ó a pơlê kong kân Đà Nẵng ƀă mâu kong pơlê peăng Tơdế tơnêi têa, kơxê lơ 19/10, pôa Nguyễn Xuân Phúc, Kăn xiâm hnê ngăn tơnêi têa lăm kơ-êng, diâp kơxuô tơmeăm ăm kuăn pơlê tro lŭp tơmeăm xua kong mêi têa kân lân lu ƀă pêi cheăng ƀă Pơlê kong kân Đà Nẵng, mâu khu xiâm, kơvâ cheăng ‘na tơdroăng rơnêu kế tơmeăm khoăng.

Klêi kơ’nâi séa ngăn kơpong, tơnêi tơníu, pôa Nguyễn Xuân Phúc, Kăn xiâm hnê ngăn tơnêi têa ƀă Khu râ kăn pêi cheăng lăm pêi cheăng ƀă khu râ kăn pơkuâ Pơlê kong kân Đà Nẵng.

Pôa Nguyễn Xuân Phúc, Kăn xiâm hnê ngăn tơnêi têa pêi cheăng ƀă khu râ kăn pơkuâ pơlê kong kân Đà Nẵng

Xông tơpui a roh pêi cheăng, rơtế ƀă chôa ‘lâng pro tơniăn pêt mơjiâng tơmeăm, tê mơdró ƀă rak tơniăn tơdroăng rêh ối, tơdroăng rêh ối tiah hmâ ăm kuăn pơlê, pôa Nguyễn Xuân Phúc pơkâ thế mơhnhôk mâu khu cheăng tŏng kum kuăn pơlê rơnêu hngêi trăng, mơgrúa kong prâi klêi kơ’nâi kong mêi têa kân lân lu; rơnêu on tơhrik, têa hum rôh jiếo, troăng phôn; rơnêu rĕng tơmeăm hngêi trăng, troăng klông ki kal xúa, ki má lối cho troăng klông, rơchôa hno têa, ngăn pơkeăng ƀă khăm pơlât, rơnêu hngêi trung tơ’nhê, tơniăn tŭm kơxôp mơ-éa hriâm mơ-éa chêh, tơmeăm hriâm tâp ăm hok tro.