Kơxo hâi lơ 26/5, tơkéa vâ tối cho hâi má 8 khế 4 hơnăm Qúy Mão, pôa Võ Văn Thưởng, Kăn xiâm hnê ngăn tơnêi têa hiăng lăm pôu, rơkâu mâu ƀok Phop, mâu kuăn khôp Phop Việt Nam a Chuô Huê Nghiêm ƀă Chuô Minh Đạo, Pơlê kong kân Hồ Chí Minh drêng troh Tĭng kân Phật đản, Phật lịch 2567 - Dương lịch hơnăm 2023.  Troh pôu, rơkâu kơ Ƀok Phop Thích Trí Quảng, Kăn xiâm pơkuâ ngăn Hô̆i đong mơnhên Tơdroăng pơkuâ khôp Phop Việt Nam a chuô Huê Nghiêm, pôa Võ Văn Thưởng, Kăn xiâm hnê ngăn hiăng pơtroh rơkong rơkâu lĕm tro má môi troh ƀok xiâm Phop; rơkâu Khu khôp Phop rơtế ƀă tâi tâng mâu kuăn khôp Phop tung tơnêi têa pin ƀă kong têa vâi ê koh tơdah Tĭng kân Phật đản tơniăn lĕm, hơniâp ro, phiu niu.

Kăn xiâm hnê ngăn tơnêi têa vêh mơnhên tối, troăng hơlâ ki môi tuăn dêi Đảng, Tơnêi têa đi đo koh nhoăm ƀă kring vế hnoăng ki loi tĭng - tiô khôp dêi kuăn pơlê, tŏng kum ƀă pro tơ’lêi hlâu ăm mâu khu râ ngăn ‘na tơdroăng khôp châ pêi pro dêi hnoăng cheăng tiô luât tơnêi têa.

Kăn xiâm hnê ngăn tơnêi têa tối nhên, Đảng, Tơnêi têa ƀă Măt trâ̆n Tơnêi têa Việt Nam loi tơngah ƀă pói  rơhêng vâ tiah kố, ƀă hnoăng cheăng pơkuâ ngăn dêi Ƀok Phop Thích Trí Quảng kô rơtế ƀă mâu kuăn khôp ai môi hneăng ki nếo châ ƀlêi chiâng; tơdrêng amê, hnê tối mâu jâ, ƀok Phop, mơngế hriâm tơdroăng Phop, kuăn khôp Phop Việt Nam pơtối rak vế, pêi pro hnoăng cheăng “Rak tro tiô tuăn loi-Hdroâng mơngế-Chuh ngaih xah hô̆i”, veăng kum ăm hneăng mơjiâng ƀă kring vế Tơnêi têa.