Kơxo lơ 3/11, pôa Nguyễn Xuân Phúc, Kăn xiâm hnê ngăn tơnêi têa tơdah Kăn teăng mâ mâu kong têa Arab Thống nhât dó inâi UAE, cho pôa Obaid Saeed Al Dhaheri koh pơ’lâng mơgêi hneăng cheăng a Việt Nam. Pôa Nguyễn Xuân Phúc rơkâu Kăn teăng mâ pêi kêi đeăng lĕm tro hnoăng cheăng a Việt Nam, tơdrêng amê, kheăn kơdeăn mâu tơdroăng veăng kum dêi Kăn teăng mâ tung hnoăng thăm tơrŭm cheăng nhŏng o, tơrŭm hên kơvâ cheăng pơla Việt Nam ƀă mâu kong têa Arab Thống nhất (UAE).

Việt Nam kheăn kơdeăn hnoăng ki kal dêi UAE a kơpong ƀă mâu hneăng hôp tơpui tơno pơla rêm pâ. Vâ thăm tơrŭm cheăng péa tơnêi têa, Kăn xiâm hnê ngăn tơnêi têa pâ thế péa pâ pêi pro mâu troăng thăm tơpui tơno mâu khu râ kăn xiâm, ki rơhêng vâ tối cho khu râ kăn xiâm; tơrŭm tơkŭm po mâu tơdroăng kal kí, cheăng kâ ƀă khôi túa lĕm tơmiât troh leh tơbâ 30 hơnăm mơjiâng tơrŭm tơpui kâ pơla péa tơnêi têa a hơnăm 2023; thăm tơrŭm môi tuăn dêi pó tung mâu hneăng hôp tơpui tơno, khu tơrŭm cheăng lâp plâi tơnêi ƀă tung kơpong.