VOV4.Xơ Đăng - Kơxêi hâi lơ 25/8, a Tíu pêi cheăng kăn xiâm hnê ngăn tơnêi têa, pôa Nguyễn Xuân Phúc, kăn xiâm hnê ngăn tơnêi têa hiăng tơdah pôa Choi Young-joo, kăn xiâm hnê ngăn Khu tơrŭm tơroâ Hàn Quốc – Việt Nam, Kăn hnê ngăn Grup Panko Hàn Quốc hneăng hdrối. A rôh tơdah, pôa Nguyễn Xuân Phúc mơnhên tối khât Grup pơkuâ Panko mơdêk tơdroăng ki ‘no liăn cheăng a Việt Nam, tơdrêng amê hlối mơnhên tối pôa Choi Young-joo, kăn xiâm hnê ngăn tơrŭm tơroâ Hàn Quốc – Việt Nam hneăng hdrối ƀă cho kăn hnê ngăn Grup Panko hiăng ai tơdroăng tŏng kum ăm Việt Nam tung rôh hbrâ mơdât ƀă pơreăng COVID-19.

Pôa Nguyễn Xuân Phúc, kăn xiâm hnê ngăn tơnêi têa tơdah pôa Choi Young-joo, kăn hnê ngăn Grup pơkuâ Panko Hàn Quốc

Malối cho tung pơla pơreăng xông tâ tú a Pơlê kong kân Hồ Chí Minh, pôa hiăng mơhnhôk khu mơdró kâ Hàn Quốc kum 1 rơtuh dollars ƀă tâi tâng kơxô̆ liăn kố hiăng châ pơtroh troh Pơlê kong kân Hồ Chí Minh vâ hbrâ mơdât pơreăng. Kăn xiâm hnê ngăn tơnêi têa rơhêng vâ Grup pơkuâ Panko veăng kum ăm kơxô̆ liăn pêi lo ing tê mơdró Việt Nam – Hàn Quốc rĕng châ 100 rơtal dollars tung la ngiâ.

Katarina Nga tơplôu ƀă tơbleăng