Kơxê lơ 25/4, a Tíu pêi cheăng Kăn xiâm hnê ngăn tơnêi têa, pôa Võ Văn Thưởng, Ngế cheăng tung Khu xiâm pơkuâ tơdroăng kal kí, Kăn xiâm hnê ngăn tơnêi têa tơdah pôa Sinlavong Khoutphaythoune, Ngế cheăng tung Khu xiâm pơkuâ kal kí Đảng Nhân yân Kăch măng Lếo, Kăn xiâm hnê ngăn Vi ƀan Tíu xiâm Măt trâ̆n Lếo mơjiâng tơnêi têa ƀă Khu kăn ki pêi dêi hnoăng cheăng dế ai rôh pôu ƀă pêi cheăng a Việt Nam.

Tơpui a rôh tơdah, poa Võ Văn Thưởng, Kăn xiâm hnê ngăn tơnêi têa loi tơngah rôh lăm pôu kố dêi Khu kăn kố kô veăng kum pro trâu rơdâ tâ nếo tơrŭm cheăng tiô khôi hmâ kân rơdêi, tơrŭm ƀă tơrŭm cheăng tung lâi tâng kơvâ cheăng Việt Nam – Lếo; tơdrêng amê hlối mơdêk rơdêi tơrŭm cheăng ƀă Tíu xiâm Măt trâ̆n Lếo mơjiâng tơnêi têa pơtối tơrŭm krá tơniăn ƀă Vi ƀan Tíu xiâm Măt trâ̆n tơnêi têa Việt Nam pêi pro tơƀrê mâu tơdroăng tơkêa tơrŭm cheăng pơla péa kơ koan; kơhnâ tơbleăng tơrŭm tung mâu kơvâ cheăng ki pêi măt trâ̆n, hnê cheăng ăm mâu ngế pêi cheăng, hnê hnhôk kuăn pơlê, tơdroăng loi tĭng tiô khôp, hdroâng kuăn ngo, ing mê veăng kum tơbêng tơrŭm cheăng kân rơdêi, tơrŭm tung tâi tâng pơla Việt Nam – Lếo rế hía rế mơnhông tơniăn lĕm, krá ton.